తిరుపతిలో భూమన కరుణాకర్ రెడ్డిపై ఫ్లెక్సీల వివాదం — TDP vs YSRCP

తిరుపతిలో YSRCP నేత భూమన కరుణాకర్ రెడ్డి, ఆయన కుమారుడు అభినయ రెడ్డి ఫోటోలతో ఫ్లెక్సీ బ్యానర్లు అర్ధరాత్రి నగరంలోని పలు ప్రధాన కూడళ్లలో కనిపించాయి. "ఆధ్యాత్మిక నగరాన్ని గంజాయి వనంగా మార్చవద్దు" అనే నినాదాలు ఈ ఫ్లెక్సీలపై ఉన్నాయి. గంజాయి కేసుల్లో నిందితుల ఫోటోలు కూడా ఆ ఫ్లెక్సీల్లో ఉన్నాయని తెలుస్తోంది.

ఈ ఫ్లెక్సీలు ఎవరు ఏర్పాటు చేశారనే విషయం స్పష్టంగా తెలియలేదు. మున్సిపల్ అధికారులు ఆ ఫ్లెక్సీలను తొలగించారు. గత రెండు మూడు రోజులుగా TDP, YSRCP కార్యకర్తలు తిరుపతిలో వేర్వేరుగా రోడ్లపైకి వచ్చి నిరసనలు తెలుపుతున్నారు.

తిరుపతిలో drug అమ్మకాలకు YSRCP నాయకులు కారణమని TDP ఆరోపిస్తోంది. TDP నేతలు మహిళలపై సోషల్ మీడియాలో అభ్యంతరకరమైన పోస్టులు పెట్టారని YSRCP ఆరోపిస్తూ చట్టపరమైన చర్యలు తీసుకోవాలని డిమాండ్ చేస్తోంది.

భూమన కరుణాకర్ రెడ్డి ఈ ఆరోపణలను తిరస్కరించారు. ప్రభుత్వం, చట్టం తమ చేతుల్లో ఉన్నాయని, అధికార పార్టీనే విచారణ జరిపించుకోవాలని ఆయన పేర్కొన్నారు.

పోలీసులు రెండు పార్టీల కీలక నేతలపై నిఘా పెట్టారు. ఎటువంటి అవాంఛనీయ ఘటన జరిగినా కేసులు నమోదు చేస్తామని పోలీసులు హెచ్చరించారు. రోజూ 70 వేల నుంచి లక్ష మంది వరకు భక్తులు వచ్చే తిరుపతిలో శాంతి భద్రతలను కాపాడడానికి intelligence విభాగం దృష్టి పెట్టిందని తెలుస్తోంది.