ఢిల్లీలో తెలంగాణ ఆవిర్భావ దినోత్సవం నిర్వహించిన బీజేపీ

ఢిల్లీలో తెలంగాణ రాష్ట్ర ఆవిర్భావ దినోత్సవాన్ని బీజేపీ నిర్వహించింది. బీజేపీ జాతీయ అధ్యక్షుడు జేపీ నడ్డా, కేంద్ర మంత్రి జి. కిషన్ రెడ్డి, తెలంగాణ బీజేపీ అధ్యక్షుడు రామచంద్రరావు, ఎంపీ రఘునందన రావు సహా పలువురు నేతలు ఈ కార్యక్రమంలో పాల్గొన్నారు.

ఈ సందర్భంగా తెలంగాణ ఉద్యమ చరిత్ర, అమరవీరులకు సంబంధించిన ఫొటో ప్రదర్శనను జేపీ నడ్డా సందర్శించారు. అనంతరం బీజేపీ నేతలు కాంగ్రెస్, BRS పాలనపై విమర్శలు చేశారు. తెలంగాణ ఏర్పాటును వ్యతిరేకించినవారే ఇప్పుడు రాష్ట్రంలో అధికారంలో ఉన్నారని నడ్డా ఆరోపించారు. BRS, కాంగ్రెస్ ప్రభుత్వాల హయాంలో అవినీతి కొనసాగిందని, కేవలం బీజేపీ వల్లనే తెలంగాణ అభివృద్ధి సాధ్యమని వారు వాదించారు.

కేంద్ర మంత్రి కిషన్ రెడ్డి మాట్లాడుతూ, కాంగ్రెస్ పార్టీ తొలి దశ ఉద్యమంలో ప్రజలను నమ్మించి మోసం చేసిందని, రాష్ట్రాన్ని ప్రజలే సాధించుకున్నారని అన్నారు. లోక్సభలో సుష్మా స్వరాజ్ తెలంగాణ బిల్లుకు మద్దతు ఇచ్చిన విషయాన్ని గుర్తుచేసి ఆమెకు నివాళి అర్పించారు.

ఢిల్లీలో ఈ వేడుకలు నిర్వహించడం ద్వారా బీజేపీ ‘మిషన్ తెలంగాణ’ చేపట్టిన సంకేతాలు కనిపిస్తున్నాయని రాజకీయ వర్గాల్లో చర్చ జరుగుతోంది. ఈ వ్యాఖ్యలపై కాంగ్రెస్, BRS పార్టీల స్పందన తెలియాల్సి ఉంది.