తెలంగాణ మున్సిపల్ ఎన్నికలపై బీజేపీ ఫోకస్‌, జాతీయ నేతల వరుస పర్యటనలు

రాబోయే గ్రేటర్ హైదరాబాద్ మున్సిపల్ కార్పొరేషన్ (GHMC) తదితర మున్సిపల్ ఎన్నికలపై బీజేపీ ప్రత్యేక దృష్టి పెట్టింది. వీటిని త్వరలో జరిగే అసెంబ్లీ ఎన్నికలకు సెమీఫైనల్‌గా పార్టీ భావిస్తోంది. 2023 అసెంబ్లీ ఎన్నికల్లో అధికారంలోకి రాలేకపోయిన బీజేపీ ఈసారి బలమైన పునాది వేయాలని ప్లాన్ చేస్తోంది.

ఈ నేపథ్యంలో బీజేపీ జాతీయ నేతలు వరుసగా తెలంగాణకు వస్తున్నారు. ఇప్పటికే నరేంద్ర మోదీ పర్యటన ముగియగా, రక్షణ శాఖ మంత్రి రాజ్‌నాథ్ సింగ్ ఈ నెల 12న రాష్ట్రంలో పర్యటించనున్నారు. ఆయన మేధావులతో భేటీ అయి మోదీ ప్రభుత్వ 12 ఏళ్ల పాలనపై చర్చించనున్నారు. ఆ తర్వాత బీజేపీ జాతీయ అధ్యక్షుడు జే.పీ.నడ్డా సుమారు మూడు రోజుల పాటు తెలంగాణలో గడపనున్నారు. పార్టీ సంస్థాగత వ్యవహారాలతో పాటు రాష్ట్ర రాజకీయాలపై ఆయన సమీక్ష చేస్తారని, ద్వితీయ శ్రేణి నాయకులతో ప్రత్యేకంగా సమావేశం కానున్నారని పార్టీ వర్గాలు తెలిపాయి.

ఇదిలా ఉంటే, రాష్ట్ర వ్యవహారాల ఇన్‌చార్జ్ అభయ్ పాటీల్, ప్రధాన కార్యదర్శి శివప్రకాష్ ఇప్పటికే రాష్ట్రంలో పర్యటిస్తూ కార్యకర్తలకు శిక్షణ ఇస్తున్నారు. బీజేపీ రాష్ట్ర అధ్యక్షుడు రామచంద్రరావు 38 సంస్థాగత జిల్లాల్లో ప్రశిక్షణ అభియాన్ చేపట్టి పార్టీని బలోపేతం చేస్తున్నారు.

అయితే ఇటీవల బండి భగీరథ్ ఘటన, ఈటల రాజేందర్ ఫ్లెక్సీల వివాదం వంటివి బీజేపీలో అంతర్గత విభేదాలను బయటపెట్టాయి. ఈ పరిణామాలు ఉన్నప్పటికీ మున్సిపల్ ఎన్నికల్లో విజయం సాధించడమే లక్ష్యంగా పార్టీ ముందుకు వెళ్తోంది. రాబోయే రోజుల్లో మరిన్ని జాతీయ నేతల పర్యటనలు ఉండే అవకాశం ఉందని పార్టీ వర్గాలు చెబుతున్నాయి.