‘కింగ్’లో దీపిక కాషాయ దుస్తులపై BJP ఎమ్మెల్యే అభ్యంతరం

షారుఖ్ ఖాన్ కథానాయకుడిగా రూపొందుతున్న ‘కింగ్’ చిత్రంలో దీపికా పదుకొనే కాషాయ రంగు దుస్తులతో కనిపించే సన్నివేశంపై BJP ఎమ్మెల్యే ఒకరు అభ్యంతరం వ్యక్తం చేశారు. ఆ సీన్‌ను చిత్రం నుంచి తొలగించాలని ఆయన డిమాండ్ చేశారు.

ఈ సందర్భంగా ఆయన మాట్లాడుతూ, కాషాయం సనాతన ధర్మానికి చిహ్నమని, దాన్ని ఎవరైనా అగౌరవపరిస్తే తాము సహించబోమని అన్నారు. షారుఖ్ ఖాన్, దీపికా పదుకొనే కలిసి నటించిన ఇదే తరహా సన్నివేశం మూడేళ్ల క్రితం ఒక చిత్రంలోనూ వివాదానికి దారితీసిందని ఆయన గుర్తు చేశారు.

సీన్ తొలగించకపోతే చిత్రాన్ని దేశవ్యాప్తంగా బహిష్కరిస్తామని, మహారాష్ట్ర నుంచి ఢిల్లీ వరకు హిందూ సంస్థలు కలిసి ఈ కార్యక్రమం చేపడతాయని ఆయన హెచ్చరించారు. కాషాయం సనాతనానికి చెందిన రంగు అని, దాన్ని అవమానించడం సనాతనాన్ని అవమానించడమే అని ఆయన అభిప్రాయపడ్డారు.

గతంలో షారుఖ్ ఖాన్–దీపికా పదుకొనే చిత్రం ‘పఠాన్’లోని పాటలో దీపికా కాషాయ రంగు దుస్తుల్లో కనిపించడంపై 2023లో పెద్ద ఎత్తున వివాదం చెలరేగింది. అప్పుడూ బహిష్కరణ పిలుపులు వచ్చాయి. సెన్సార్ బోర్డు కొన్ని మార్పులు చేయాలని చిత్ర బృందాన్ని కోరింది.

ఇప్పుడు అదే అంశం ‘కింగ్’తో మళ్లీ తెరపైకి వచ్చింది. సీన్ తొలగించాలన్న డిమాండ్‌పై చిత్ర బృందం నుంచి ఇంకా ఎలాంటి అధికారిక ప్రకటన రాలేదు.