సింహాచలం వరాహ లక్ష్మీ నరసింహస్వామిని దర్శించుకున్న బీజేపీ జాతీయ నాయకులు

బీజేపీ జాతీయ నాయకులు సింహాచలం శ్రీ వరాహ లక్ష్మీ నరసింహస్వామి ఆలయాన్ని దర్శించుకున్నారు. వీరిలో నితిన్ నబీన్, జాతీయ ప్రధాన కార్యదర్శి సంతోష్, జాతీయ సంఘటన కార్యదర్శి శివప్రకాష్, బీజేపీ రాష్ట్ర అధ్యక్షుడు పీవీఎన్ మాధవ్ ఉన్నారు.

ఆలయానికి చేరుకున్న నాయకులకు ఆలయ కార్యనిర్వహణ అధికారి జల్లేపల్లి వెంకట్రావు, ప్రధానార్చకులు శ్రీనివాసాచార్యులు స్వాగతం పలికారు. నాదస్వర బృందం, వేద పండితుల మంత్రోచ్ఛారణల మధ్య నాయకులు కప్ప స్తంభాన్ని ఆలింగనం చేసుకున్నారు.

అనంతరం బేడ మండపంలో ప్రదక్షిణలు చేశారు. స్వామి వారిని భక్తి శ్రద్ధలతో దర్శించుకున్నారు. దర్శనం తర్వాత కళ్యాణ మండపంలో వేద పండితులు వేద ఆశీర్వచనం అందించారు.

ఆలయ కార్యనిర్వహణ అధికారి జల్లేపల్లి వెంకట్రావు స్వామి వారి ప్రసాదం, జ్ఞాపికగా చిత్రపటాన్ని నాయకులకు అందజేశారు.