బీజేపీ రాజ్యసభ అభ్యర్థుల జాబితాతో కేంద్ర కేబినెట్ విస్తరణపై ఊహాగానాలు

ప్రధాని నరేంద్ర మోదీ నేతృత్వంలోని కేంద్ర ప్రభుత్వం 11 మంది రాజ్యసభ అభ్యర్థులను ప్రకటించింది. ఈ జాబితాలో ఇద్దరు కేంద్ర సహాయ మంత్రులు రవనీత్ సింగ్ బిట్టు, జార్జ్ కురియన్‌లకు చోటు లభించలేదు.

రవనీత్ సింగ్ బిట్టు ప్రస్తుతం రైల్వే శాఖ సహాయ మంత్రిగా, జార్జ్ కురియన్ మత్స్య, పశుసంవర్ధక శాఖ సహాయ మంత్రిగా ఉన్నారు. వీరిద్దరి రాజ్యసభ పదవీకాలం త్వరలోనే ముగియనుంది. దీంతో వారు కేంద్ర మంత్రివర్గం నుంచి తప్పుకోవాల్సి వస్తుందనే చర్చ ఢిల్లీ వర్గాల్లో మొదలైంది. వీరి స్థానంలో కొత్త వారిని తీసుకోవడం, అదే సమయంలో కేంద్ర కేబినెట్ విస్తరణ జరపాల్సిన అవసరం ఉంటుందని విశ్లేషకులు భావిస్తున్నారు.

మూడోసారి మోదీ సర్కార్ ఏర్పడి రెండేళ్లు పూర్తయిన నేపథ్యంలో ఈ విస్తరణ జరిగే అవకాశం ఉందని చెబుతున్నారు. రాబోయే ఉత్తరప్రదేశ్, పంజాబ్, ఉత్తరాఖండ్, గోవా అసెంబ్లీ ఎన్నికలను దృష్టిలో పెట్టుకుని బీజేపీ ఈ మార్పులు చేపట్టొచ్చని రాజకీయ విశ్లేషకులు పేర్కొంటున్నారు.

పంజాబ్‌లో బీజేపీ సీనియర్ నేత తరుణ్ చుగ్‌ను కేంద్ర మంత్రివర్గంలో చేర్చుకుంటారనే చర్చ కూడా జరుగుతోంది. అయితే దీనిపై అధికారిక ప్రకటన రాలేదు. కేంద్ర కేబినెట్ విస్తరణపై బీజేపీ అగ్రనేతలు ఇంకా ఎలాంటి వ్యాఖ్యలు చేయలేదు.