శ్రీకాళహస్తి: ఇంటింటికీ కార్యక్రమంలో ఎమ్మెల్యే బొజ్జల సుధీర్ రెడ్డి – సంక్షేమ పథకాలు, నిధుల వివరాలు వెల్లడి

శ్రీకాళహస్తి నియోజకవర్గం పరిధిలోని కాసరం కొత్త హరిజనవాడలో ఎమ్మెల్యే బొజ్జల సుధీర్ రెడ్డి ‘ఇంటింటికీ మన ఎమ్మెల్యే’ కార్యక్రమంలో పాల్గొన్నారు. ఈ సందర్భంగా ఆయన ఇంటింటికీ వెళ్లి కుటుంబాల సమస్యలను అడిగి తెలుసుకున్నారు. సంక్షేమ పథకాలు అందుతున్నాయో లేదో పరిశీలించారు. సమస్యలు ఎదుర్కొంటున్న వారికి అక్కడికక్కడే అధికారులతో ఫోన్లో మాట్లాడి పరిష్కారం చూపినట్లు తెలిపారు.

ఈ సందర్భంగా ఎమ్మెల్యే మాట్లాడుతూ, కాసరం పంచాయతీకి మొత్తం రూ.11.28 కోట్ల నిధులు విడుదల చేశామన్నారు. ఇందులో ఎన్టీఆర్ భరోసా పెన్షన్ కింద రూ.3.57 కోట్లు, తల్లికి వందనం పథకానికి రూ.52 లక్షలు, ఆటో డ్రైవర్ సహాయ పథకానికి రూ.15 లక్షలు, పశుగ్రాసం కోసం రూ.70 వేలు, స్వయం సహాయక సంఘాల రుణాల కింద రూ.5.34 కోట్లు విడుదల చేసినట్లు వివరించారు. రోడ్ల నిర్మాణానికి రూ.13 లక్షలతో పనులు చేపట్టామని, నిరుపేదలకు ఇళ్లు లేనివారికి హౌసింగ్ పథకం వర్తింపజేస్తున్నామని చెప్పారు.

భవిష్యత్తు ప్రణాళికల గురించి మాట్లాడుతూ, వర్షపు నీటి పారుదల కోసం డ్రైనేజీ ప్రతిపాదనలు సిద్ధం చేస్తున్నామని, ఇంటి స్థలం లేని పేదలకు మూడు సెంట్ల భూమి ఇచ్చేందుకు చర్యలు తీసుకుంటామని తెలిపారు. ప్రజల స్పందనపై ఆయన సంతృప్తి వ్యక్తం చేసినట్లు తెలిసింది.