దియా మీర్జా వీడియో తొలగింపుపై బాంబే హైకోర్టు అసంతృప్తి; తిరిగి అప్‌లోడ్ చేయాలని సూచన

దీపావళి ప్రచార వీడియోను బృహన్ ముంబై మున్సిపల్ కార్పొరేషన్ (BMC) తొలగించడంపై బాంబే హైకోర్టు అసంతృప్తి వ్యక్తం చేసింది. ఆ వీడియోను తిరిగి అప్‌లోడ్ చేయడం సముచితమని కోర్టు అభిప్రాయపడింది.

ఈ కేసును హైకోర్టు సుమోటోగా స్వీకరించింది. భారతదేశం లౌకిక దేశమని కోర్టు గుర్తు చేసింది. పర్యావరణ హితంగా దీపావళి జరుపుకోవాలని చేసిన విజ్ఞప్తిలో తప్పేముందని ప్రశ్నించింది. బహిరంగ ప్రదేశాల్లో బాణసంచా కాల్చవద్దని నటి ప్రజలకు కోరిన విషయాన్ని కూడా కోర్టు ప్రస్తావించింది.

దియా మీర్జాపై రాజకీయ నాయకులు చేసిన వ్యాఖ్యలపై కోర్టు తీవ్ర అసంతృప్తి వ్యక్తం చేసింది. ఏ పండుగ నుంచి ఏ వ్యక్తిని దూరం చేయకూడదని సుప్రీం కోర్టు చెప్పిన స్ఫూర్తిని గుర్తు చేసింది. ప్రజా ప్రయోజనం కోసం సహకరించిన సెలబ్రిటీలపై చేసిన వ్యాఖ్యలు తమను కలిచివేశాయని పేర్కొంది.

దీపావళి కోసం BMC కొందరు సెలబ్రిటీలతో ప్రచార వీడియోలు రూపొందించింది. వాటిలో నటి మాధురీ దీక్షిత్, నిశిగంధ వాడ్, క్రికెటర్ అజింక్య రహానే, దియా మీర్జా నటించారు. దియా మీర్జా మతం ఆధారంగా కొందరు ఆమె వీడియోను వ్యతిరేకించారు. పండుగను ఎలా జరుపుకోవాలో తమకు ఎవరూ చెప్పాల్సిన అవసరం లేదని కొందరు BJP నేతలు అన్నారు. దీంతో BMC ఆమె వీడియోను మాత్రమే తొలగించింది. మిగిలిన వీడియోలను కొనసాగించింది.

ముంబై BJP అధ్యక్షుడు అమిత్ సతం ఈ విజ్ఞప్తులను 'తుక్డే తుక్డే గ్యాంగ్'తో ముడిపెట్టి విమర్శించారు. హిందువుల పండుగలు ఎలా జరుపుకోవాలో నియంత్రించేందుకు భారత్ వ్యతిరేక శక్తులు ప్రయత్నిస్తున్నాయని ఆరోపించారు.

హైకోర్టు సూచనలపై BMC అప్పీల్‌కు వెళ్లే యోచనలో ఉన్నట్టు సమాచారం ఉంది.