అంబటితో వేదిక పంచుకున్న ఘటనపై బోండా ఉమా పార్టీ కమిటీకి వివరణ

టీడీపీ ఎమ్మెల్యే బోండా ఉమా, ముద్రగడ పద్మనాభం సంస్మరణ సభలో వైఎస్సార్ కాంగ్రెస్ పార్టీ నేత అంబటి రాంబాబుతో కలిసి వేదికపై కూర్చున్న ఘటనపై పార్టీ త్రీమెన్ కమిటీకి వివరణ ఇచ్చారు.

ఆ సభలో తాను చేసిన వ్యాఖ్యలను కొన్ని వర్గాలు కావాలనే వక్రీకరించి దుష్ప్రచారం చేశాయని బోండా ఉమా ఆరోపించారు. తాను పార్టీ లైన్ దాటలేదని, వ్యక్తిగత పరిచయం నేపథ్యంలో మాత్రమే ఆయనతో మాట్లాడానని కమిటీకి స్పష్టం చేశారు.

ఈ సందర్భంగా బోండా ఉమా మాట్లాడుతూ, ముద్రగడ సంస్మరణ సభ కాపు సామాజిక వర్గం నిర్వహించిన కార్యక్రమమని, అందులో అన్ని పార్టీల నాయకులు పాల్గొన్నారని చెప్పారు. అంబటి రాంబాబు వేదికపైకి వచ్చి పలకరించగా, నమస్కారం చెప్పి సంభాషించానని, ఇద్దరూ బహిరంగ వేదికపైనే కూర్చున్నామని వివరించారు. పార్టీ కార్యాలయాల్లో రహస్యంగా సమావేశం కాలేదని నొక్కి చెప్పారు.

త్వరలో ముఖ్యమంత్రి చంద్రబాబు నాయుడు, మంత్రి నారా లోకేష్‌లను కలిసి తన వైఖరిని వివరిస్తానని బోండా ఉమా తెలిపారు. ఇతర టీడీపీ నేతలు కూడా ఇలాంటి సామాజిక కార్యక్రమాలకు హాజరయ్యారని, ఇది పార్టీ వ్యతిరేక చర్య కాదని ఆయన వాదించారు.