ఎన్టీఆర్ జిల్లా కంచికచర్లలో అక్రమ తవ్వకం గుంతలో పడి 8 ఏళ్ల బాలుడు మృతి

ఎన్టీఆర్ జిల్లా కంచికచర్లలో శనివారం సాయంత్రం నుంచి కనిపించకుండా పోయిన 8 ఏళ్ల బాలుడు ఆదివారం ఉదయం విగతజీవిగా కనిపించాడు. చెరువులో అక్రమంగా తవ్విన మట్టి గుంతలో పడి బాలుడు మృతి చెందినట్లు పోలీసులు తెలిపారు.

కంచికచర్లలోని చెరువులో అక్రమ మట్టి తవ్వకాలు జరుగుతున్నాయి. ఈ తవ్వకాల్లో ఏర్పడిన గుంతల్లో ఒకదానిలో పడి బాలుడు ప్రాణాలు కోల్పోయాడు. స్థానిక కట్టబజార్‌కు చెందిన బాలుడు శనివారం సాయంత్రం ఆడుకునేందుకు బయటకు వెళ్లి ఇంటికి తిరిగి రాలేదు.

కుటుంబ సభ్యులు వెతికినా ఆచూకీ లభించలేదు. ఆదివారం ఉదయం చెరువు సమీపంలో బాలుడి మృతదేహం కనిపించింది. పోలీసులు సంఘటన స్థలానికి చేరుకొని మృతదేహాన్ని పోస్టుమార్టం నిమిత్తం నందిగామ ప్రభుత్వ ఆసుపత్రికి తరలించారు.

ఈ ఘటనపై కేసు నమోదు చేసి దర్యాప్తు ప్రారంభించినట్లు పోలీసులు తెలిపారు. అయితే, కనీసం తల్లిదండ్రులకు సమాచారం ఇవ్వకుండానే మృతదేహాన్ని తరలించారని బంధువులు ఆరోపించారు. అక్రమ తవ్వకాలను అధికారులు ప్రోత్సహిస్తున్నారని, బాధ్యులపై కఠిన చర్యలు తీసుకోవాలని వారు డిమాండ్ చేశారు.

సంఘటన స్థలంలో కొంతసేపు ఉద్రిక్తత నెలకొన్నా, స్థానిక నాయకులు పరిస్థితిని చల్లబరచడంతో ప్రశాంతంగా మారింది. పోస్టుమార్టం అనంతరం మృతదేహాన్ని బంధువులకు అప్పగిస్తామని పోలీసులు తెలిపారు.