బృహస్పతి వ్రతం: శ్రావణ మాసంలో గురువారం నాడు ఆచరించే విధానం

శ్రావణ మాసంలో బృహస్పతి వ్రతాన్ని గురువారం నాడు ఆచరిస్తారు. బుధ, బృహస్పతి గ్రహాల అనుగ్రహం కోసం ఈ వ్రతాన్ని చేస్తారని భక్తుల విశ్వాసం.

ఈ వ్రతాన్ని బుధ బృహస్పతి వ్రతం అని కూడా పిలుస్తారు. కొందరు భక్తులు బుధవారం, గురువారం రెండు రోజులూ ఈ వ్రతాన్ని ఆచరిస్తారు. కర్ణాటక, మహారాష్ట్ర ప్రాంతాల్లో ఈ వ్రతం ఎక్కువగా ఉంది.

పూజ గదిలో బుధుడు, గురువు ఇద్దరి చిత్రపటాన్ని ఒక వేదికపై ఉంచుతారు. పటాన్ని పూలమాలతో అలంకరించి, దీపం ధూపం వెలిగిస్తారు. 'బుధాయ నమః', 'బృహస్పతయే నమః' అని స్తోత్రం చేస్తారు.

ఈ వ్రతంలో జొన్న రొట్టెను నైవేద్యంగా సమర్పిస్తారు. తర్వాత ఆ జొన్న రొట్టెలను చిన్నారులకు ప్రసాదంగా పంచుతారు. చిన్నారులకు తెలివి, జ్ఞాపక శక్తి పెరుగుతాయని భక్తులు నమ్ముతారు.

బుధ గ్రహ అనుగ్రహం వల్ల గ్రహించే శక్తి పెరుగుతుందని, గురు గ్రహ అనుగ్రహం వల్ల జ్ఞాపక శక్తి, మాటల నైపుణ్యం లభిస్తుందని భక్తులు చెప్తారు. గురువు వాహనం ఏనుగు, బుధుడి వాహనం సింహం అని విశ్వాసం. శ్రావణ మాసంలో వచ్చే గురువారాల్లో ఈ వ్రతాన్ని ఆచరించవచ్చు.