అమెరికాలో $900, భారత్లో ₹35: క్యాన్సర్ మందు ధరలో భారీ తేడా

అమెరికన్ మహిళ లిస్ అనే వ్యక్తి ఇన్స్టాగ్రామ్లో పోస్ట్ చేసిన వీడియో ఇప్పుడు సోషల్ మీడియాలో వైరల్గా మారింది. ఈ వీడియోలో అమెరికా, భారత్ మధ్య ఒక క్యాన్సర్ ఔషధం ధరలో ఉన్న భారీ తేడాను ఆమె చూపించారు. ఆమె అంటీ బ్లడ్ క్యాన్సర్తో బాధపడుతుండగా, రెవ్లిమిడ్ అనే బ్రాండెడ్ మందును తీసుకోవాల్సి వస్తోంది. అమెరికాలో ఈ మందు ఒక్క టాబ్లెట్ ధర $900 (₹85,000) ఉంటే, భారతదేశంలో ఇదే మందు ₹35 నుంచి ₹300 లోపు లభిస్తుందని ఆమె తెలిపారు. ఈ వీడియోను ఇప్పటికే 8 లక్షల మందికి పైగా వీక్షించారు.

మరో అమెరికన్ పౌరురాలు విక్టోరియా కూడా ఇలాంటి అనుభవాన్ని పంచుకున్నారు. తనకు అవసరమైన ఒక లైఫ్-సేవింగ్ మందుకు ఇన్సూరెన్స్ కంపెనీ కవరేజ్ నిరాకరించడంతో $1000 (₹94,000) బిల్లు ఎదురైంది. ఆ తర్వాత భారతీయ ఫార్మా తయారీదారుల నుంచి నేరుగా కేవలం $25కే ఆమె ఆ మందును కొనుగోలు చేశారు.

ఈ ధరల వ్యత్యాసానికి ప్రధాన కారణం దేశాల పేటెంట్ చట్టాలలోని భేదం. అమెరికా వంటి పాశ్చాత్య దేశాల్లో ఫార్మా కంపెనీలు పేటెంట్ చట్టాల సాయంతో దశాబ్దాల పాటు ఉత్పత్తిపై గుత్తాధిపత్యం కలిగి ఉంటాయి. కానీ 1970లో భారత్ ప్రొడక్ట్ పేటెంట్ స్థానంలో ప్రాసెస్ పేటెంట్ను ప్రవేశపెట్టడంతో జెనరిక్ మందుల రివర్స్ ఇంజనీరింగ్ సాధ్యమైంది. దీంతో భారత్ ప్రపంచ ఫార్మసీగా ఎదిగింది.

భారతదేశంలో ప్రభుత్వ ఆసుపత్రుల్లో ఉచిత క్యాన్సర్ చికిత్సలు, జన ఔషధి కేంద్రాల ద్వారా చౌకగా మందులు లభిస్తున్నాయి. అమెరికాలో ఉచిత లేదా రాయితీ వైద్యం అందించే ప్రభుత్వ హాస్పిటల్స్ కొరత, ఇన్సూరెన్స్ కంపెనీల జోక్యం వల్ల రోగులు ఆర్థిక ఇబ్బందులు ఎదుర్కొంటున్నారని సోషల్ మీడియాలో చర్చ జరుగుతోంది.

కొందరు నెటిజన్లు అమెరికన్ పౌరులు భారత్కు వచ్చి 10-15 రోజుల్లో వైద్యం చేయించుకుని, మందులు తీసుకెళ్తే అమెరికాలో అయ్యే ఖర్చు కంటే తక్కువకే సాధ్యమవుతుందని సూచిస్తున్నారు.