సాంకేతిక సమస్యలు తొలగి.. CBSE 12వ రీవ్యాల్యుయేషన్ పోర్టల్ లైవ్

CBSE 12వ తరగతి విద్యార్థులకు సంబంధించిన రీవ్యాల్యుయేషన్ పోర్టల్ మంగళవారం ఉదయం నుంచి లైవ్‌లోకి వచ్చింది. జూన్ 1నే ప్రారంభించాలనుకున్న ఈ పోర్టల్ సాంకేతిక సమస్యల కారణంగా 24 గంటలు ఆలస్యమైంది. సమస్యలను పరిష్కరించిన పిదప ఇవాళ ఉదయం CBSE ఈ పోర్టల్‌ను యాక్టివేట్ చేసింది.

పోర్టల్ ద్వారా విద్యార్థులు తమ జవాబు పత్రాల ఫొటోకాపీ, వెరిఫికేషన్, రీవ్యాల్యుయేషన్ కోసం దరఖాస్తు చేసుకోవచ్చు. దరఖాస్తు విధానంపై CBSE ఒక స్టెప్‌-బై-స్టెప్ గైడ్, వీడియోను కూడా విడుదల చేసింది. విద్యార్థులు post.cbseit.in/PVR అనే లింక్ ద్వారా లాగిన్ అవ్వాలి. లాగిన్ తర్వాత మూడు ఆప్షన్లు కనిపిస్తాయి - వెరిఫికేషన్, రీచెకింగ్, రీవ్యాల్యుయేషన్. ఆయా ఆప్షన్లను ఎంచుకుని ఫీజు చెల్లించాల్సి ఉంటుంది.

ఫలితాలు వచ్చిన మే 13 నుంచి CBSE పోర్టల్‌లో సాంకేతిక సమస్యలు ఎదురవుతూనే ఉన్నాయి. విద్యార్థులు ఫీజు చెల్లించే సమయంలో ఇబ్బందులు పడ్డారు. గతంలో ఓ 19 ఏళ్ల హ్యాకర్ CBSE వెబ్‌సైట్‌ను హ్యాక్ చేసి సైబర్ భద్రతా లోపాలను ఎత్తిచూపడం కూడా చర్చనీయాంశంగా మారింది. ఈ నేపథ్యంలో తాజా సమస్యలతో CBSE వ్యవస్థపై మరిన్ని ప్రశ్నలు తలెత్తాయి.

రీవ్యాల్యుయేషన్ పోర్టల్‌ను తెరవాలని విద్యార్థులు డిమాండ్ చేస్తూ వచ్చారు. మార్కుల విషయంలో అసంతృప్తితో ఉన్న లక్షల మంది విద్యార్థులకు ఇది మరో అవకాశం. కావాలనుకునే విద్యార్థులు తక్షణం పోర్టల్ ద్వారా దరఖాస్తు చేసుకోవచ్చని CBSE ప్రకటించింది.