12 ఏళ్లలో కేంద్రం ఆలయాభివృద్ధి, సాంస్కృతిక పునరుజ్జీవనం

గత 12 ఏళ్లలో కేంద్ర ప్రభుత్వం దేశవ్యాప్తంగా ఉన్న ప్రధాన పుణ్యక్షేత్రాలు, ఆలయాల అభివృద్ధికి అనేక పథకాలు అమలు చేసింది. ‘వికాస్ బీ, విరాసత్ బీ’ నినాదంతో మౌలిక సదుపాయాలు, యాత్రికుల సేవలు మెరుగుపరిచేందుకు ప్రభుత్వం పెద్ద మొత్తంలో నిధులు కేటాయించింది.

2024 జనవరిలో అయోధ్యలో రామ మందిర నిర్మాణం పూర్తయి, బాలరాముడి ప్రాణ ప్రతిష్ట జరిగింది. దీంతో అయోధ్య నగరానికి అధునాతన రోడ్లు, లైటింగ్, క్యూ కాంప్లెక్స్లు వంటి సదుపాయాలు వచ్చాయి. కేంద్ర ఆధ్యాత్మిక పర్యాటక పథకం ‘ప్రసాద్’ కింద పలు క్షేత్రాల్లో ఘాట్లు, లైటింగ్, యాత్రికుల విశ్రాంతి గృహాల నిర్మాణానికి వందల కోట్ల రూపాయలు ఖర్చు చేశారు.

‘స్వదేశ్ దర్శన్’ స్కీమ్ ద్వారా ఆధ్యాత్మిక సర్క్యూట్లు ఏర్పాటు చేసి, రోడ్లు, రైళ్లు, హెలికాప్టర్ కనెక్టివిటీని పెంచారు. కాశీ విశ్వనాథ్ కారిడార్ నిర్మాణానికి సుమారు 800 కోట్లు వెచ్చించారు. కేదార్నాథ్, బద్రీనాథ్ ఆలయాల ఆధునికీకరణ, ఉజ్జయినీలో మహాకాల్ లోక్ కారిడార్ నిర్మాణం కూడా చేపట్టారు. విదేశాల్లో అబుదాబీలో హిందూ దేవాలయం, బహ్రెయిన్‌లో 200 ఏళ్ల నాటి కృష్ణుడి ఆలయ పునరుద్ధరణ జరుగుతున్నాయి.

గత దశాబ్దంలో విదేశాల నుంచి 600కు పైగా పురాతన విగ్రహాలు, కళాఖండాలను భారత్‌కు తిరిగి తీసుకొచ్చింది. 2014 తరువాత ప్రారంభమైన ఈ చర్యలతో, ఇంతకుముందు శిథిలావస్థలో ఉన్న ఎన్నో క్షేత్రాలు ఆర్థిక కేంద్రాలుగా మారుతున్నాయని ప్రభుత్వ వర్గాలు పేర్కొంటున్నాయి.