కేంద్రీయ గిరిజన వర్సిటీ తొలి స్నాతకోత్సవం ఈ నెల 30న విశాఖలో; ముఖ్య అతిథిగా రాష్ట్రపతి

కేంద్రీయ గిరిజన విశ్వవిద్యాలయం తొలి స్నాతకోత్సవం ఈ నెల 30న విశాఖపట్నంలోని ఆంధ్ర యూనివర్సిటీ ప్రాంగణంలో జరగనుంది. రాష్ట్రపతి ద్రౌపది ముర్ము ముఖ్య అతిథిగా హాజరవుతున్నారు.

విజయనగరం జిల్లా కొత్తవలస మండలం రెల్లిలో గత టీడీపీ ప్రభుత్వం ఈ కేంద్రీయ విశ్వవిద్యాలయానికి శంకుస్థాపన చేసింది. అనంతరం 2019లో వైఎస్ఆర్ కాంగ్రెస్ పార్టీ ప్రభుత్వం అధికారంలోకి రాగా, వెంటాడ మండలం దత్తిరాజేరు సరిహద్దులో 2023 అక్టోబర్‌లో మళ్లీ శంకుస్థాపన చేశారు. కానీ అప్పట్లో భవన నిర్మాణం ప్రారంభం కాలేదు. 2024 జూలైలో కూటమి ప్రభుత్వం అధికారంలోకి వచ్చిన తర్వాత నిర్మాణ పనులు మొదలయ్యాయి.

ప్రస్తుతం చిన్నమేడపల్లి, మర్రివలస గ్రామాల పరిధిలో 519 ఎకరాల్లో రూ.834 కోట్లతో భవనాలు నిర్మిస్తున్నారు. అకడమిక్ బ్లాక్, పరిపాలన భవనం తదితర ఐదు భవనాల పనులు జోరుగా సాగుతున్నాయి. ఈ ఏడాది కొత్త భవనాల్లో తరగతులు ప్రారంభించేందుకు అధికారులు చర్యలు తీసుకుంటున్నారు. వచ్చే ఏడాది మొత్తం పనులు పూర్తి చేస్తామని చెబుతున్నారు.

సొంత భవనాలు పూర్తి కాకపోవడంతో తొలి స్నాతకోత్సవాన్ని విశాఖలో నిర్వహిస్తున్నారు. ఈ కార్యక్రమంలో గవర్నర్ అబ్దుల్ నజీర్, ముఖ్యమంత్రి చంద్రబాబు నాయుడు, మంత్రి లోకేశ్ కూడా పాల్గొంటారు. రాష్ట్రపతి పర్యటన నేపథ్యంలో విశాఖ జిల్లా కలెక్టర్ అభిషిక్ కిషోర్, పోలీస్ కమిషనర్ శంఖభ్రత బాక్చి ఏర్పాట్లను పరిశీలించారు. ప్రోటోకాల్, భద్రత, పార్కింగ్, అత్యవసర సేవలపై అధికారులకు సూచనలు చేశారు.