ఏపీ గ్రామీణాభివృద్ధికి ₹16,627 కోట్ల కేంద్ర నిధులు

16వ ఆర్థిక సంఘం కింద ఆంధ్రప్రదేశ్ గ్రామీణ అభివృద్ధికి కేంద్ర ప్రభుత్వం ₹16,627 కోట్ల నిధులు కేటాయించింది. 2026-27 నుంచి 2030-31 వరకు ఐదేళ్లలో ఈ నిధులు విడతల వారీగా విడుదలవుతాయి.

ఈ మొత్తంలో ₹13,302 కోట్లు బేసిక్ గ్రాంట్లు, ₹3,325 కోట్లు పనితీరు ఆధారిత గ్రాంట్లు. 15వ ఆర్థిక సంఘం నిధులతో పోలిస్తే సుమారు ₹3,800 కోట్లు అదనంగా లభించాయి.

మొత్తం నిధుల్లో 70% గ్రామ పంచాయతీలకు, 15% మండల పరిషత్‌లకు, 15% జిల్లా పరిషత్‌లకు కేటాయించారు. టైడ్ గ్రాంట్లలో 50% తాగునీరు, పారిశుద్యం, ఘన వ్యర్థాల నిర్వహణకు ఖర్చు చేయాలి. అన్టైడ్ నిధుల్లో రోడ్ల పనులకు 10% మాత్రమే వినియోగించాలని నిబంధన విధించారు.

నిధులు పొందేందుకు స్థానిక ఎన్నికలు నిర్వహించడం, బ్యాంకు ఖాతాలు ఆన్‌లైన్‌లో ఉంచడం, ఈ-గ్రామ్ స్వరాజ్ పోర్టల్‌లో వివరాలు నమోదు చేయడం తప్పనిసరి. ప్రతి ఐదేళ్లకు రాష్ట్ర ఆర్థిక సంఘం నివేదికను శాసనసభకు సమర్పించాలి. ఈ నిధులు గ్రామీణ మౌలిక వసతుల అభివృద్ధికి తోడ్పడతాయని అధికారులు ఆశిస్తున్నారు.