పేపర్ లీక్ నిరోధక చట్టానికి కేంద్రం సవరణలు: జైలు శిక్ష 10 ఏళ్లకు పెంపు

పేపర్ లీక్ నిరోధక చట్టాన్ని మరింత కఠినతరం చేసేందుకు కేంద్ర కేబినెట్ సవరణల బిల్లుకు ఆమోదం తెలిపింది. ఈ బిల్లును సోమవారం పార్లమెంటులో ప్రవేశపెట్టనున్నారు.

ప్రస్తుతం అమలులో ఉన్న పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెర్ మీన్స్) యాక్ట్, 2024 ప్రకారం పేపర్ లీక్ చేసిన వ్యక్తికి 3 నుంచి 5 ఏళ్ల జైలు శిక్ష, గరిష్టంగా ₹10 లక్షల వరకు జరిమానా విధించే అవకాశం ఉంది. సంస్థలు, ఏజెన్సీలు లీక్ చేస్తే ₹1 కోటి వరకు జరిమానా పడుతుంది.

కొత్త సవరణల ప్రకారం వ్యక్తిగతంగా పాల్పడితే జైలు శిక్షను 10 ఏళ్ల వరకు పెంచుతారు. జరిమానా మొత్తం కూడా గణనీయంగా పెరిగే అవకాశం ఉంది. వ్యవస్థీకృత ముఠాల కేసుల్లో నాన్‌బెయిలబుల్ సెక్షన్లు అమలు చేయడంతో పాటు ఫాస్ట్ ట్రాక్ కోర్టులు ఏర్పాటు చేయనున్నారు.

దేశవ్యాప్తంగా విద్యార్థులు పేపర్ లీకుల వల్ల ఇబ్బందులు ఎదుర్కొంటున్న నేపథ్యంలో ప్రధానమంత్రి నరేంద్రమోదీ ఈ అంశంపై స్పందించారు. కొద్ది గంటల్లోనే కేబినెట్ ఆమోదం తెలియడం గమనార్హం. లీకుల నిరోధానికి చట్టంలో లొసుగులు సవరించడంతో పాటు దోషులకు శిక్ష తగ్గించే అవకాశం లేకుండా చర్యలు తీసుకుంటున్నారు.