క్యాన్సర్ మందుల ధరలపై కేంద్రం కోత: 137 రకాల మందుల ధరలు తగ్గింపు

క్యాన్సర్ చికిత్సకు వాడే 137 రకాల మందుల ధరలను కేంద్ర ప్రభుత్వం తగ్గించింది. ఈ మందులకు సంబంధించిన 679 బ్రాండ్ల ధరలు 50 శాతానికి పైగా పడ్డాయి.

రసాయనాలు, ఎరువుల మంత్రిత్వ శాఖ పరిధిలోని నేషనల్ ఫార్మాస్యూటికల్ ప్రైసింగ్ అథారిటీ (NPPA) ఈ ప్రకటన విడుదల చేసింది. ఆరోగ్య, కుటుంబ సంక్షేమ మంత్రిత్వ శాఖ నిపుణుల కమిటీ సిఫారసుల ఆధారంగా ఈ ఏడాది అక్టోబర్ 17న ఈ 137 క్యాన్సర్ వ్యతిరేక మందుల MRP పై వాణిజ్య మార్జిన్‌కు పరిమితి విధించారు. సవరించిన MRP లు ఇప్పటికే అమల్లోకి వచ్చాయి.

దీపావళి నాటికి, అంటే నవంబర్ 8 నాటికి 85 ఫార్మా కంపెనీలు 121 రకాల మందులకు సంబంధించిన 1,364 క్యాన్సర్ వ్యతిరేక ఫార్ములేషన్ల కొత్త ధరలను ప్రకటించాయి. ఈ బ్రాండ్లలో అత్యధికంగా ఒక మందు ధరపై 96.45 శాతం కోత పడింది.

ఈ తగ్గింపు వల్ల రోగులకు ఏటా సుమారు ₹3,540 కోట్లు ఆదా అవుతాయని కేంద్రం అంచనా వేసింది. కొత్త ధరల కంటే ఎక్కువ రేటుకు అమ్మితే కఠిన చర్యలు తీసుకుంటామని హెచ్చరించింది. మందుల ప్యాకెట్లపై ముద్రించిన కొత్త MRP ను పరిశీలించాలని NPPA కి సూచించింది.

ఫార్మా సహీ దామ్ మొబైల్ యాప్ లేదా NPPA అధికారిక వెబ్ సైట్‌లో మందుల ధరలను చెక్ చేసుకోవచ్చు. ఎవరైనా కొత్త ధరల కంటే ఎక్కువకు అమ్మితే ఫార్మా జన్ సమాధాన్ పోర్టల్‌లో ఫిర్యాదు చేయవచ్చు. ఫిర్యాదుల కోసం హెల్ప్ లైన్ నంబర్ కూడా అందుబాటులో ఉంది.