పిల్లల్లో టైప్ 1 డయాబెటిస్: కేంద్రం కొత్త గైడ్‌లైన్స్ విడుదల

భారతదేశంలో చిన్నారులలో టైప్ 1 డయాబెటిస్ కేసులు వేగంగా పెరుగుతున్న నేపథ్యంలో, కేంద్ర ఆరోగ్య మంత్రిత్వ శాఖ తల్లిదండ్రులు, ఉపాధ్యాయుల కోసం కొత్త గైడ్‌లైన్స్ విడుదల చేసింది. ఈ వ్యాధి 300 మంది పిల్లలలో ఒకరికి ఉండగా, సంవత్సరానికి 4 నుంచి 5 శాతం చొప్పున పెరుగుతూ ఆందోళన కలిగిస్తోంది. ప్రస్తుతం దేశంలో 2 నుంచి 3 లక్షల మంది పిల్లలు టైప్ 1 డయాబెటిస్‌తో బాధపడుతున్నారు.

కేంద్రం విడుదల చేసిన గైడ్‌లైన్స్‌లో ‘4T’ ఫ్రేమ్‌వర్క్ ప్రతిపాదించింది. దీని ప్రకారం, పిల్లల్లో దాహం ఎక్కువ అవడం (Thirst), తరచుగా మూత్ర విసర్జన చేయడం (Toilet), నీరసంగా ఉండటం (Tiredness), బరువు తగ్గడం (Thinner) — ఈ నాలుగు లక్షణాలు కనిపిస్తే వెంటనే వైద్యులను సంప్రదించాలి. ఐదేళ్ల తర్వాత కూడా మంచం మీద మూత్ర విసర్జన చేస్తే అది మరో లక్షణంగా గుర్తించాలి.

టైప్ 1 డయాబెటిస్ అనేది ఆటో ఇమ్యూన్ వ్యాధి. శరీరం ఇన్సులిన్ ఉత్పత్తి చేయదు. జన్యుపరమైన కారణాలు, వైరస్ సంక్రమణ వల్ల ప్యాంక్రియాస్ దెబ్బతినడం, కుటుంబ చరిత్ర వంటివి ఈ వ్యాధికి కారణమవుతాయి. 4 నుండి 7 సంవత్సరాల మధ్య, 10 నుండి 14 సంవత్సరాల మధ్య ఈ వ్యాధి మొదలయ్యే అవకాశం ఎక్కువగా ఉంటుంది.

చికిత్సలో ఇన్సులిన్ ఇంజెక్షన్లు మాత్రమే మార్గం. షుగర్ స్థాయిలు హఠాత్తుగా తగ్గడం (హైపోగ్లేసమియా) ప్రమాదకరం. దీని లక్షణాలు: వణుకు, చెమటలు, తలనొప్పి, మగత, కొన్ని సందర్భాల్లో కోమాలోకి వెళ్లే ప్రమాదం ఉంటుంది. కాబట్టి భోజనానికి ముందు రక్తంలో చక్కెర స్థాయి 80-130 మధ్య, భోజనం తర్వాత 180 కంటే తక్కువ ఉండేలా చూసుకోవాలి. ప్రతి మూడు నెలలకు హెచ్‌బిఎ1సి పరీక్ష తప్పనిసరి.

పిల్లల్లో పై లక్షణాలు కనిపిస్తే నిర్లక్ష్యం చేయకుండా వెంటనే వైద్య సహాయం తీసుకోవాలని నిపుణులు సూచిస్తున్నారు. టైప్ 1 డయాబెటిస్‌ను ముందుగానే గుర్తించి సరైన నిర్వహణ చేస్తే పిల్లలు సాధారణ జీవితం గడపవచ్చు.