వెండి దిగుమతులపై కేంద్రం మరిన్ని ఆంక్షలు

వెండి దిగుమతులపై కేంద్రం మరింత కఠినమైన నిబంధనలు విధించింది. విదేశీ మారక నిల్వలపై ఒత్తిడిని తగ్గించి, రూపాయి విలువను కాపాడేందుకు ఈ నిర్ణయం తీసుకుంది.

కొత్త నిబంధనల ప్రకారం పొడి గ్రైన్ రూపంలో వెండిని దిగుమతి చేసుకోవడంపై నిషేధం విధించారు. ఈ ఉత్పత్తులను దిగుమతి చేసుకోవాలంటే డైరెక్టరేట్ జనరల్ ఆఫ్ ఫారిన్ ట్రేడ్ (డీజీఎఫ్టీ) అనుమతి తప్పనిసరి. ఇది గత నెలలో వెండి కడ్డీలు, పాక్షికంగా తయారైన వెండి వస్తువులపై విధించిన నిషేధానికి కొనసాగింపు.

గత ఆర్థిక సంవత్సరంలో భారతదేశం రికార్డు స్థాయిలో సుమారు 1.15 లక్షల కోట్ల రూపాయల విలువైన వెండిని దిగుమతి చేసుకుంది. ఇది అంతకుముందు ఏడాదితో పోలిస్తే 150 శాతానికి పైగా పెరగడంతో రూపాయి విలువపై తీవ్ర ప్రభావం పడింది. ముడి బంగారం దిగుమతులు కూడా విదేశీ మారక నిల్వలు కరిగిపోవడానికి కారణమవుతున్నాయి.

ఆసియా దేశాల నుంచి తక్కువ పన్నులతో ఆభరణాల రూపంలో వెండిని ముడి సరుకుగా తెచ్చి దుర్వినియోగం చేస్తున్నారనే ఆరోపణల నేపథ్యంలో కేంద్రం ఈ చర్యలు చేపట్టింది. ఈ కొత్త నిబంధనలతో దేశీయ మార్కెట్లో వెండి సరఫరా తగ్గి, ధరలు పెరిగే అవకాశం ఉంది. సోలార్ ప్యానెల్స్, ఎలక్ట్రిక్ వాహనాలు, మొబైల్ ఫోన్లు, ఎలక్ట్రానిక్ చిప్ల తయారీలో వెండి కీలకమైన ముడిసరుకు. ఈ పరిశ్రమలకు ముడి సరుకు లభ్యత కష్టమవుతుందని నిపుణులు అభిప్రాయపడుతున్నారు.