పరీక్షల అక్రమాలపై కఠిన చట్టం: 10 ఏళ్ల జైలు, ₹50 లక్షల జరిమానా ప్రతిపాదన

ప్రభుత్వ పరీక్షల్లో అవకతవకలకు పాల్పడే వారికి కఠిన శిక్షలు విధించేందుకు కేంద్ర ప్రభుత్వం కీలక నిర్ణయం తీసుకుంది. పబ్లిక్ ఎగ్జామ్స్ (అన్ఫెయిర్ మీన్స్ ప్రివెన్షన్) సవరణ బిల్లు 2026ను సోమవారం పార్లమెంటులో ప్రవేశపెట్టే అవకాశం ఉంది. ఈ బిల్లు ప్రకారం, పరీక్షల్లో అక్రమాలకు పాల్పడిన అభ్యర్థులకు కనీసం 5 ఏళ్ల నుంచి గరిష్టంగా 10 ఏళ్ల వరకు జైలు శిక్ష, ₹10 లక్షల నుంచి ₹50 లక్షల వరకు జరిమానా విధించేలా ప్రతిపాదించారు.

పరీక్ష నిర్వహణ సంస్థలు (సర్వీస్ ప్రొవైడర్స్) చేసిన తప్పిదాలకు జరిమానాను ₹1 కోటి నుంచి ₹5 కోట్లకు పెంచారు. అలాగే, అలాంటి సంస్థలను నిషేధించే కాల పరిమితిని 4 ఏళ్ల నుంచి 8 ఏళ్లకు పొడిగించాలని నిర్ణయించారు. నేరం రుజువైతే, కంపెనీ డైరెక్టర్లు లేదా ఉన్నతాధికారులకు కనీసం 5 ఏళ్ల జైలు, ₹5 కోట్ల వరకు జరిమానా విధించే అవకాశం ఉంది.

వ్యవస్థీకృత పరీక్ష కుంభకోణాల విషయంలో కూడా శిక్షలు కఠినతరం చేశారు. కనీస శిక్షను 5 ఏళ్ల నుంచి 7 ఏళ్లకు, కనీస జరిమానాను ₹1 కోటి నుంచి ₹10 కోట్లకు పెంచారు. ఇలాంటి కేసుల దర్యాప్తుకు ప్రత్యేక టాస్క్ ఫోర్స్ ఏర్పాటు చేయాలని ఈ బిల్లు ప్రతిపాదిస్తోంది.

దర్యాప్తు ప్రక్రియను వేగవంతం చేయడంలో భాగంగా, పోలీసులు లేదా కేంద్ర దర్యాప్తు సంస్థలు లేదా టాస్క్ ఫోర్స్ మొత్తం దర్యాప్తును 2 నెలలలోపు పూర్తి చేయాలని నిబంధన పెట్టారు. ప్రతి రాష్ట్రం, కేంద్రపాలిత ప్రాంతంలో ప్రత్యేక ఫాస్ట్ ట్రాక్ కోర్టులు ఏర్పాటు చేస్తారు. ఛార్జిషీట్ దాఖలైన 3 నెలల్లోపు విచారణ పూర్తి చేయాలని, ప్రతిపాదిత చట్టం అమల్లోకి రాకముందే పెండింగ్ కేసులను కూడా ఈ ఫాస్ట్ ట్రాక్ కోర్టులకు బదిలీ చేయాలని నిర్ణయించారు. రాష్ట్రాలు, కేంద్రపాలిత ప్రాంతాలు ప్రత్యేక పబ్లిక్ ప్రాసిక్యూటర్లను నియమించే అవకాశం కల్పించారు.

ఫాస్ట్ ట్రాక్ కోర్టు తీర్పులపై వచ్చే అప్పీళ్లను హైకోర్టుకు చెందిన ఇద్దరు న్యాయమూర్తులతో కూడిన డివిజన్ బెంచ్ విచారించనుంది. అప్పీళ్లపై సాధ్యమైనంత వరకు 3 నెలల్లోపు నిర్ణయం తీసుకోవాలని నిబంధన విధించారు. కేంద్ర మంత్రివర్గం ఇప్పటికే ఈ బిల్లును ఆమోదించింది. సోమవారం పార్లమెంటులో ప్రవేశపెట్టే అవకాశం ఉంది.