22A భూ సమస్యలు ఏడాదిలో పరిష్కారం: సీఎం చంద్రబాబు

ముఖ్యమంత్రి చంద్రబాబు నాయుడు 22A భూ సమస్యలను ఏడాది లోపు పరిష్కరిస్తామని హామీ ఇచ్చారు. కుప్పం నియోజకవర్గ పర్యటనలో శుక్రవారం కంగుందిలో రైతులను ఉద్దేశించి ఆయన ఈ ప్రకటన చేశారు.

గత YSRCP ప్రభుత్వ హయాంలో ప్రత్యర్థుల భూములను 22A పేరిట నిషేధిత జాబితాలో చేర్చారని చంద్రబాబు ఆరోపించారు. ఈ తప్పులను సరిదిద్దుతున్నామని, ఇప్పటికే రెండేళ్లు గడిచాయని, మరో ఏడాదిలో పూర్తి చేస్తామని తెలిపారు. కొంతమందిని తక్కువ ధరకు భూమి ఇవ్వాలని, పార్టీ మారాలని ఒత్తిడి చేయగా, ఒప్పుకోనందుకు 22A ద్వారా భూమి ప్రభుత్వానికి రాసీయడం జరిగిందని వివరించారు.

ఇలాంటి సమస్యలకు శాశ్వత పరిష్కారంగా సర్వే, ప్రూఫ్ ఆఫ్ కాన్సెప్ట్ ద్వారా యజమాని సంతకం తీసుకుని, పత్రాలను మద్రాస్ సెక్యూరిటీ ప్రెస్‌లో కరెన్సీ నోట్ల మాదిరిగా ముద్రించి అందిస్తామని చంద్రబాబు చెప్పారు.

ఇదే కార్యక్రమంలో 60 ఏళ్లుగా అటవీ భూమిని సాగు చేస్తున్న 322 మంది రైతులకు 460.19 ఎకరాల అసైన్మెంట్ పట్టాలు పంపిణీ చేశారు. లబ్ధిదారులు చంద్రబాబుకు కృతజ్ఞతలు తెలిపారు. సమీపంలో శిలాఫలకాన్ని ఆవిష్కరించిన సీఎం, కుటుంబ భూ వివాదాలు సామరస్యంగా పరిష్కరించుకోవాలని హితవు పలికారు.

నేరాలను ప్రోత్సహించే రాజకీయ పార్టీలకు దూరంగా ఉండాలని ప్రజలకు చంద్రబాబు విజ్ఞప్తి చేశారు. తాను రాజకీయ నాయకులు, నక్సలైట్లతో పోరాడానని, ఇప్పుడు నేరస్తులతో కూడిన ‘గొడ్డలి పార్టీ’ని ఎదుర్కొంటున్నానన్నారు. స్వర్ణకుప్పం విజన్ 2029 లో భాగంగా కుప్పం మాస్టర్ ప్లాన్‌పై సుర్బానా జూరాంగ్, ఐఐటి కాన్పూర్ ప్రతినిధులతో సమీక్ష నిర్వహించినట్లు అధికార వర్గాలు తెలిపాయి.