వైసీపీ నేతలు నాటకాలు సృష్టిస్తున్నారని సీఎం చంద్రబాబు ఆరోపణ; అభివృద్ధి ప్రణాళికలు ప్రకటన

కాకినాడ జిల్లా తునిలో ఏర్పాటు చేసిన ప్రజావేదికలో ముఖ్యమంత్రి చంద్రబాబు నాయుడు ప్రసంగించారు. ఈ సందర్భంగా ఆయన వైసీపీ నేతలు తప్పుడు నాటకాలు రచించి కాలం వెళ్లదీస్తున్నారని ఆరోపించారు.

గత కొద్ది రోజుల్లో జరిగిన కొన్ని ఘటనలను గుర్తు చేశారు. సింగయ్య అనే వ్యక్తిని కారుతో తొక్కించి చంపి, దానిని అంబులెన్స్, పోలీసులపై నెపం వేసే ప్రయత్నం చేశారని చెప్పారు. కడప నుంచి ఒక పాస్టర్ ను పాడేరుకు పంపించి, తనపై దాడి జరిగినట్టు నాటకం ఆడించారని, రాష్ట్రంలో మత విద్వేషాలు రాజేసేందుకు ఈ దుష్ప్రచారం చేశారని ఆరోపించారు. రాజమండ్రిలో మద్యం తాగి వచ్చి ఒక పాస్టర్ యాక్సిడెంట్‌లో మృతి చెందిన ఘటనను వైసీపీ వక్రీకరించిందని విమర్శించారు. తిరుమల కొండపై ఖాళీ మద్యం బాటిళ్లు పెట్టించి, అక్కడ మధ్యం అమ్ముతున్నారనే తప్పుడు ప్రచారం చేసినట్టు ఆరోపించారు.

కడపలో డిప్యూటీ మేయర్, నలుగురు కలిసి డబ్బు వివాదంలో ఒకరిని చంపి, ఆ నింద టీడీపీపై వేసే ప్రయత్నం చేసినట్టు చెప్పారు. నంద్యాలలో రాజశేఖర్ రెడ్డి విగ్రహాన్ని ధ్వంసం చేసి, సానుభూతి పొందేందుకు ప్రయత్నించిన వైసీపీ నేతలు 20 నిమిషాల్లోనే పట్టుబడ్డారని వివరించారు.

ఈ పరిణామాలను బట్టి వైసీపీ నేతలు ప్రజలను తప్పుదారి పట్టించే ప్రయత్నాలు చేస్తున్నారని, అలాంటి వారిపై కఠిన చర్యలు తీసుకుంటామని సీఎం స్పష్టం చేశారు. ఎన్డీఏ కూటమి బలంగా ఉందని, ప్రధాని మోడీ, ఉపముఖ్యమంత్రి పవన్ కల్యాణ్‌తో కలిసి ప్రజాహితం కోసం పనిచేస్తున్నామని చెప్పారు.

రాష్ట్ర అభివృద్ధి ప్రణాళికలపై మాట్లాడుతూ, విశాఖపట్నం రీజియన్‌లో కాకినాడ, పాత ఈస్ట్ గోదావరి ప్రాంతాలు, అమరావతి రీజియన్, తిరుపతి రీజియన్‌గా విభజించి అభివృద్ధి కార్యక్రమాలు చేపడతామని ప్రకటించారు.

ఆర్థిక ఇబ్బందులు, అంతర్జాతీయ పరిస్థితుల ప్రభావం రాష్ట్రంపై పడిందని, ఇరాన్-ఇజ్రాయెల్ యుద్ధం వల్ల గ్యాస్, పెట్రోల్, డీజిల్ ధరలు పెరిగాయని, నిత్యావసర వస్తువుల రేట్లు కూడా పెరిగే అవకాశం ఉందని వివరించారు. రైతులు పండించే అరటి, కూరగాయల పంటలను ఎగుమతి చేయడం కష్టంగా మారిందని, లాజిస్టిక్స్ సమస్యలు తలెత్తాయని తెలిపారు.

ఈ సంవత్సరం వాతావరణం తీవ్రంగా ఉందని, 48 డిగ్రీల ఉష్ణోగ్రత నమోదైందని, వర్షపాతం సాధారణం కంటే తక్కువగా ఉండొచ్చని అంచనా వేశారు. ప్రజలు ఈ సవాళ్లను అర్థం చేసుకోవాలని, తప్పుడు ప్రచారాలను నమ్మవద్దని సీఎం విజ్ఞప్తి చేశారు.