గిరిజన ప్రాంతాల్లో ఫీడర్ అంబులెన్సులు, 108 సేవలు – CM చంద్రబాబు ప్రకటన

ముఖ్యమంత్రి నారా చంద్రబాబు నాయుడు ఏపీ గిరిజన ప్రాంతాల్లో వైద్య రవాణా సౌకర్యాలను మెరుగుపర్చే చర్యలు ప్రకటించారు. రోగులను డోలీలపై మోయకుండా, ఫీడర్ అంబులెన్సులు, 108, 104 మొబైల్ వైద్య వాహనాలను త్వరలో అందించనున్నట్లు చెప్పారు.

రహదారి అనుసంధానం కోసం 2,336 గిరిజన ఆవాసాలకు మిషన్ మోడ్ లో పనులు జరుగుతున్నాయని, డిప్యూటీ సీఎం పవన్ కళ్యాణ్ ఈ ప్రాజెక్టును పర్యవేక్షిస్తున్నారని చంద్రబాబు వివరించారు. జల్జీవన్ మిషన్ ద్వారా 3,22,991 కుటుంబాలకు కుళాయి నీటి సదుపాయం 2027 డిసెంబర్ నాటికి కల్పిస్తామని హామీ ఇచ్చారు.

ఇండ్ల నిర్మాణం విషయంలో 64,066 ఇళ్లను నిర్మించడంతోపాటు 83,923 మంది లబ్ధిదారుల ఇళ్లపై సోలార్ ప్యానెల్స్ ఏర్పాటు చేస్తామన్నారు. అడవి తల్లి బాట పేరుతో రూ.1,000 కోట్లతో 905 కి.మీ. అటవీ రహదారులు నిర్మిస్తామని తెలిపారు.

టెలికాం కంపెనీలతో ఒప్పందం చేసుకుని మారుమూల గిరిజన తాండాలు, గ్రామాలకు సెల్‌ఫోన్ సిగ్నల్ అందించనున్నట్లు ప్రకటించారు. కాఫీ సాగుపై 25 ఏళ్ల క్రితం ప్రారంభించిన ప్రయత్నం విజయవంతమైందని, ఇప్పుడు మిరియాలు, పసుపు కూడా సాగు చేస్తున్నారని పేర్కొన్నారు.