పిల్లలే సంపద అని భావిస్తున్నా: సంజీవని కార్యక్రమంలో CM చంద్రబాబు

AP CM చంద్రబాబు నాయుడు సంజీవని కార్యక్రమంలో మాట్లాడుతూ జనాభా, ఆరోగ్యంపై తన అభిప్రాయాలు పంచుకున్నారు.

భవిష్యత్తులో పిల్లలే నిజమైన సంపద అని చంద్రబాబు పేర్కొన్నారు. పిల్లలు లేకుంటే యంత్రాల కోసం పని చేయాల్సిన పరిస్థితి వస్తుందని ఆందోళన వ్యక్తం చేశారు. ఈ విషయంపై ప్రతి కుటుంబం చర్చించుకోవాలని కోరారు. జనాభా విధానంపై భవిష్యత్తులో అవగాహన తీసుకొస్తానని ఆయన చెప్పారు.

ఆరోగ్యకరమైన ప్రజలే రాష్ట్రానికి నిజమైన సంపద అని చంద్రబాబు అన్నారు. మందులు, ఆపరేషన్లపై ఆధారపడే బదులు మంచి ఆహారం, వ్యాయామం, యోగ, ధ్యానం, ప్రాణాయామం ద్వారా ఆరోగ్యాన్ని కాపాడుకోవాలని సూచించారు. రోజూ అర్ధ గంట ఈ అభ్యాసాలు చేస్తే రోగాలు దూరమవుతాయని ఆయన చెప్పారు.

"ఆహారమే మందు, వంటశాలే ఔషధశాల" అని చంద్రబాబు నొక్కి చెప్పారు. పౌష్టికమైన ఆహారాన్ని మితంగా తినడం తాను స్వయంగా పాటిస్తున్నానని తెలిపారు.