మన్యం కాఫీ విస్తరణ: లక్ష ఎకరాల సాగు లక్ష్యంగా ప్రభుత్వ ప్రణాళిక

మన్యం ప్రాంతంలో కాఫీ సాగును విస్తరించేందుకు ప్రభుత్వం ప్రణాళికలు రూపొందించింది. రాబోయే ఐదేళ్లలో లక్ష ఎకరాల్లో కాఫీ తోటలను అభివృద్ధి చేయనున్నట్లు అధికారులు తెలిపారు. మొదటి దశలో ఈ ఏడాది 10 వేల ఎకరాలకు కాఫీ మొక్కలు పంపిణీ చేయనున్నారు. పాత తోటల పునరుద్ధరణ కోసం ఏడాదికి 15 వేల ఎకరాల చొప్పున ఐదేళ్లలో 75 వేల ఎకరాల్లో చర్యలు తీసుకోనున్నారు.

అల్లూరి సీతారామరాజు జిల్లాలోని పాడేరు, అరకు ప్రాంతాల్లో ఈ ప్రాజెక్టు అమలవుతుంది. గిరిజన రైతులకు అదనపు ఆదాయం కోసం 30 వేల ఎకరాల్లో పండ్ల మొక్కలు కూడా ఇవ్వనున్నారు. ఇప్పటికే గ్రామ స్థాయిలో కాఫీ నర్సరీలు ఏర్పాటు చేశామని ఐటీడీఏ అధికారులు వెల్లడించారు.

గతంలో ఆదివాసీ దినోత్సవం సందర్భంగా సీఎం చంద్రబాబు నాయుడు కాఫీ తోటల సాగుకు రూ. 202 కోట్ల నిధులు ప్రకటించారు. ఇప్పుడు ఆ ప్రాజెక్టులో భాగంగా చింతపల్లిలో రూ. 4 కోట్లతో కాఫీ పల్పింగ్ యూనిట్ నిర్మిస్తున్నారు. మధ్య దళారులను తప్పించి నేరుగా రైతులకు ఆదాయం చేకూర్చేలా ఈ సౌకర్యం ఏర్పాటు చేస్తున్నామని అధికారులు తెలిపారు.