₹500, ₹1,000, ₹2,000 నోట్లు రద్దు చేయాలి: సీఎం చంద్రబాబు నాయుడు

₹500, ₹1,000, ₹2,000 నోట్లను రద్దు చేయాలని ముఖ్యమంత్రి చంద్రబాబు నాయుడు కోరారు. చెలామణిలో ₹100, ₹200 నోట్లు మాత్రమే ఉండాలని ఆయన అన్నారు.

డిజిటల్ కరెన్సీ విషయంలో తాను ఇదివరకే ప్రధానమంత్రికి వివరాలు అందించానని చంద్రబాబు చెప్పారు. ఇప్పుడు మళ్లీ ఇదే డిమాండ్ చేస్తానని, ఈ అంశంపై మాట్లాడుతూనే ఉంటానని ఆయన తెలిపారు.

టెక్నాలజీ పర్ఫెక్ట్‌గా ఉంటే సంపద సృష్టి కష్టం కాదని ఆయన అభిప్రాయపడ్డారు. పేదరిక నిర్మూలన కూడా అంత కష్టం కాదన్నారు. వ్యవస్థల్లో లోపాలు ఉన్నందున అవినీతి చక్రం కొనసాగుతోందని, దానికి చెక్ పెట్టే ప్రయత్నంలో భాగంగా ఈ డిమాండ్ చేస్తున్నట్టు ఆయన వివరించారు.

సంపద సృష్టి, ఆర్థిక అసమానతల తగ్గింపుపై తాను ఎప్పుడూ మాట్లాడుతుంటానని చంద్రబాబు అన్నారు. సంపద సృష్టిస్తేనే పేదరిక నిర్మూలన సాధ్యమవుతుందని ఆయన అన్నారు. సంపద సృష్టించడం డబ్బులు ఉన్నవారి కోసం కాదని, ఆ ఆదాయంతో పేద ప్రజలను ఆదుకోవాలని ఆయన తెలిపారు.

ఈ డిమాండ్‌పై కేంద్ర ప్రభుత్వం లేదా RBI స్పందన లభ్యం కాలేదు.