వర్షాభావం: తాగునీటి ఎద్దడి లేకుండా చూడాలని సీఎం చంద్రబాబు ఆదేశం

తీవ్ర వర్షాభావ పరిస్థితుల నేపథ్యంలో తాగునీటి కొరతపై ముఖ్యమంత్రి చంద్రబాబు నాయుడు సచివాలయంలోని ఆర్టీజీఎస్ కేంద్రంలో సమీక్ష నిర్వహించారు. ఈ సమావేశంలో ఆయన అధికారులకు పలు కీలక ఆదేశాలు ఇచ్చారు.

రిజర్వాయర్లలో నీటి లభ్యతను నిరంతరం పర్యవేక్షించాలని, తాగునీటి సరఫరాకు అంతరాయం లేకుండా చూడాలని ముఖ్యమంత్రి సూచించారు. ఎగువ ప్రాంతాల్లో కురుస్తున్న వర్షాల కారణంగా కృష్ణా బేసిన్లో నీటి లభ్యత పెరిగే అవకాశం ఉందని అధికారులు వివరించినట్లు తెలిసింది.

కృష్ణా నదిలో ఎగువ ప్రాంతాల నుండి వచ్చే వరద జలాలను సమర్థంగా వినియోగించుకోవాలని, నీటి నిర్వహణపై దృష్టి పెట్టాలని ఆయన ఆదేశించారు. గోదావరి నదిలో కూడా వరద పరిస్థితిని అధికారులు ముఖ్యమంత్రికి తెలియజేశారు.

రాబోయే రోజుల్లో వర్షాభావం వల్ల పశుగ్రాసం కొరత తలెత్తే అవకాశం ఉండటంతో, ఆ శాఖ అధికారులు ముందస్తు చర్యలు తీసుకోవాలని నిర్దేశించారు. మున్సిపాలిటీలు, గ్రామీణ ప్రాంతాల్లో తాగునీటి నాణ్యత పరీక్షలు క్రమం తప్పకుండా నిర్వహించాలని, ఫలితాలు విడుదల చేయాలని సూచించారు. అంగన్వాడీ కేంద్రాలను అధికారులు తనిఖీ చేయాలని కూడా ఆదేశించారు.