కుప్పంలో 322 మంది రైతులకు భూమి పట్టాలు పంపిణీ చేసిన సీఎం చంద్రబాబు

ఆంధ్రప్రదేశ్ ముఖ్యమంత్రి చంద్రబాబు నాయుడు శనివారం కుప్పం నియోజకవర్గంలో పర్యటించారు. చిత్తూరు జిల్లా కుప్పం మండలం కందుగు రెవెన్యూలో 460.19 ఎకరాల అటవీ భూమిని 60 ఏళ్లుగా సాగు చేస్తున్న 322 మంది రైతులకు అసైన్మెంట్ పట్టాలు పంపిణీ చేశారు.

కుప్పంలో 118 కోట్ల రూపాయలతో అత్యాధునిక బస్ స్టాండ్, డిపో నిర్మాణానికి శంకుస్థాపన చేశారు. అంతేకాకుండా అక్కడి ఓ హాస్పిటల్‌లో స్కానింగ్ సెంటర్, డయాలసిస్ సెంటర్‌ను ప్రారంభించారు.

సభలో మాట్లాడిన సీఎం, 22A భూముల విషయంలో గత ప్రభుత్వం ప్రజల ఆస్తులను నిషేధిత జాబితాలో చేర్చి వారికి ఇబ్బందులు కలిగించిందని ఆరోపించారు. ఈ భూముల సమస్యలను ఏడాది లోపు పరిష్కరిస్తామని హామీ ఇచ్చారు. అధికారులు అధికార దుర్వినియోగం చేయకుండా ఉండేందుకు వారానికి రెండు గంటలు ప్రజా ఫిర్యాదులను తాను స్వయంగా సమీక్షిస్తున్నట్లు తెలిపారు. తిరుపతి జిల్లా శెట్టిపల్లి, గుంటూరు జిల్లా వట్టిచెరుకూరులో దశాబ్దాల భూ వివాదాలు సామరస్యంగా పరిష్కరించినట్లు ఉదాహరణగా చెప్పారు.

అనంతరం తన రాజకీయ వైఖరిని స్పష్టం చేస్తూ, హత్యలు, రౌడీజంతో తనకు సంబంధం లేదని, రాజకీయాలే తన వృత్తి అని సీఎం వ్యాఖ్యానించారు. అమరావతి దేవతల రాజధాని అని, దాన్ని ఎవరూ మార్చలేరని అన్నారు. కుప్పం మూడు రోజుల పర్యటనలో పలు అభివృద్ధి కార్యక్రమాలను ప్రారంభించిన ఆయన, నియోజకవర్గాన్ని ఆదర్శవంతంగా తీర్చిదిద్దుతామని ప్రకటించారు.