తాటి కల్లు తాగిన సీఎం చంద్రబాబు.. గీత కార్మికురాలి ఇంటికి వెళ్లి సమస్యలు అడిగి తెలుసుకున్నారు

ఏపీ ముఖ్యమంత్రి చంద్రబాబు నాయుడు ఒక గీత కార్మికురాలి ఇంటికి వెళ్లి, ఆమె సమస్యలు అడిగి తెలుసుకున్నారు. ఆమె స్వయంగా తయారు చేసిన తాటి కల్లును రుచి చూశారు.

కల్లు గీసే మహిళతో సీఎం మాట్లాడుతూ, కుటుంబ స్థితిగతులు, నెలవారీ ఆదాయం, పని సమయం, చెట్ల సంఖ్య వంటి వివరాలు కనుక్కున్నారు. ఆమె ముగ్గురు పిల్లలు, ఇల్లు లేకపోవడం, ట్యాప్ వాటర్ లేని సమస్య గురించి వివరించింది. ప్రతి నెల రూ.4000 పింఛను ఎటువంటి ఇబ్బంది లేకుండా అందుతోందని ఆమె తెలిపింది.

ఆ మహిళ తాటి చెట్ల నుంచి రోజుకు 6 గంటలు పని చేస్తూ, నెలకు సుమారు రూ.5000 ఆదాయం పొందుతున్నట్టు చెప్పింది. కల్లు తయారీలో ఆధునిక పరికరాలు లేవని, సంప్రదాయ పద్ధతులతోనే పనిచేస్తున్నామని వివరించింది.

ఈ సందర్భంగా సీఎం స్పందిస్తూ, “గీత కార్మికుల సంక్షేమం కోసం ప్రభుత్వం అనేక చర్యలు తీసుకుంటోంది. ఇళ్లు లేని వారికి ఇల్లు కట్టిస్తాం, ట్యాప్ వాటర్ కనెక్షన్ ఇప్పిస్తాం. గీత కార్మికులకు షాపుల్లో 15% రిజర్వేషన్తో పాటు, మరిన్ని సౌకర్యాలు కల్పించేందుకు ప్రణాళికలు సిద్ధం చేస్తున్నాం” అని హామీ ఇచ్చారు. గీత కార్మికుల సమస్యల పరిష్కారానికి త్వరలో తగిన నిర్ణయాలు తీసుకుంటామని సీఎం భరోసా ఇచ్చారు.