ఎల్‌నినో నివారణకు కార్యాచరణ ప్రణాళిక: ఆక్వా రైతులకు రూ.1.50 విద్యుత్, పొగాకుకు కిలో రూ.10 సాయం

ఆంధ్రప్రదేశ్‌లో ఎల్నినో ప్రభావాన్ని ఎదుర్కొనేందుకు ప్రభుత్వం కార్యాచరణ ప్రణాళిక ప్రకటించింది. ఈ నెల నుంచి నాన్-ఆక్వా జోన్‌లోని ఆక్వా రైతులకు యూనిట్‌కు రూ.1.50 చొప్పున రాయితీ విద్యుత్ ఇవ్వాలని ముఖ్యమంత్రి చంద్రబాబు నాయుడు నిర్ణయించారు. రాష్ట్రంలో అక్టోబర్ వరకు లోటు వర్షపాతం ముప్పు ఉన్నందున, ఆగస్టు 7 నుంచి విస్తృత అవగాహన ప్రచార కార్యక్రమాలు నిర్వహించాలని సీఎం ఆదేశించారు.

ఈ విద్యుత్ రాయితీ నిర్ణయం వల్ల దాదాపు 12,500 మంది ఆక్వా రైతులకు లబ్ధి చేకూరనుంది. రొయ్య మేత ధరలు పెరగకుండా నియంత్రించేందుకు కేంద్ర ప్రభుత్వంతో చర్చలు జరుగుతున్నాయి. ఫిష్ మీల్ ఎగుమతులు 50 శాతానికి తగ్గించాలని కోరుతూ, కేంద్ర నిర్ణయం వచ్చేంత వరకు స్థానికంగా రొయ్యమేత ధరలను అదుపులో ఉంచాలని అధికారులకు సూచించారు.

ఆఫ్ స్టైల్ పొగాకు రైతులను ఆదుకోవడానికి కిలోకు రూ.10 మద్దతు ధర ఇవ్వాలని సీఎం ప్రకటించారు. మొత్తం 94 కోట్ల రూపాయల కార్యాచరణ ప్రణాళిక కింద 94 మిలియన్ కిలోల పొగాకు కొనుగోలు చేస్తారు. ఈ నిర్ణయంతో 44,000 మంది రైతులకు ప్రయోజనం కలుగుతుంది. ఎఫ్సీవీ పొగాకు రైతులకు బార్న్‌కు రూ.50,000 రుణ సహాయం అందిస్తారు. కొనుగోళ్ల పర్యవేక్షణకు ఐదుగురు సభ్యుల ప్రత్యేక కమిటీ ఏర్పాటు చేశారు.

రాయలసీమను హార్టికల్చర్ హబ్‌గా అభివృద్ధి చేయడానికి 201 ఉద్యాన క్లస్టర్లు త్వరలో ప్రారంభిస్తామని సీఎం తెలిపారు. వర్షపాతం తగ్గే పరిస్థితులకు అనుగుణంగా ప్రత్యామ్నాయ పంటల ప్రణాళికలు సిద్ధం చేయాలని, రైతులకు వాతావరణ సమాచారం రైతు యాప్ ద్వారా అందించాలని అధికారులను ఆదేశించారు. పశువుల దాణా కొరత రాకుండా వీబీజే రామజీ పథకాన్ని అనుసంధానించారు. ఎల్నినో ప్రభావంపై ఇక నుంచి ప్రతి మంగళవారం సీఎం స్వయంగా సమీక్ష నిర్వహిస్తారు.