కుప్పంలో అభివృద్ధి, సంక్షేమ పథకాలను వివరించిన సీఎం చంద్రబాబు

AP ముఖ్యమంత్రి చంద్రబాబు నాయుడు తన సొంత నియోజకవర్గం కుప్పంను సందర్శించారు. ఈ సందర్భంగా అక్కడ చేపట్టిన వివిధ సంక్షేమ, అభివృద్ధి కార్యక్రమాల వివరాలను వెల్లడించారు.

ముఖ్యమంత్రి మాట్లాడుతూ కుప్పంలో ఇప్పటికే 5,179 ఇళ్లు నిర్మించి లబ్ధిదారుల ఖాతాల్లో ₹102 కోట్లు జమ చేసినట్లు తెలిపారు. గ్యాస్ కనెక్షన్ల కోసం 1,433 మంది దరఖాస్తు చేసుకోగా వారికి కనెక్షన్లు అందించామన్నారు. సంక్షేమ పథకాల కోసం ₹550 కోట్లు ఖర్చు చేసినట్లు వెల్లడించారు.

NTR భరోసా కింద 3,946 మందికి ₹6,000 నుంచి ₹15,000 వరకు ఆర్థిక సాయం అందించామని, అన్నదాత సుఖీభవ పథకం కింద 36,473 మందికి, తల్లికి వందనం పథకం కింద 32,973 మందికి సహాయం చేసినట్లు చంద్రబాబు తెలిపారు. మహిళలకు ఉచిత బస్సు సేవలు అందించే శ్రీశక్తి పథకం కింద నియోజకవర్గంలో 37.03 లక్షల మంది మహిళలు ప్రయాణించారన్నారు.

స్వచ్ఛ కుప్పం కార్యక్రమంలో భాగంగా నియోజకవర్గంలో ఎక్కడా చెత్త కనిపించకూడదని సీఎం సూచించారు. చెత్త సేకరణ కోసం 143 ఎలక్ట్రిక్ శానిటేషన్ వాహనాలు, మూడు CNG ప్లాంట్లు ఏర్పాటు చేసినట్లు తెలిపారు. చెత్త నుంచి బయోడీజిల్, కరెంట్ ఉత్పత్తి చేస్తూ సర్క్యులర్ ఎకానమీ దిశగా అడుగులు వేస్తున్నామన్నారు.

ఈ నెలలోనే తల్లికి వందనం పథకం కింద అర్హులైన పిల్లలందరి తల్లుల ఖాతాల్లో నగదు జమ చేస్తామని చంద్రబాబు హామీ ఇచ్చారు. కుప్పంను ఎక్స్పీరియన్స్ సెంటర్గా తీర్చిదిద్దాలని ఆకాంక్షించారు.