తెలంగాణ వ్యాప్తంగా సర్దార్ సర్వాయి పాపన్న గౌడ్ 376వ జయంతి వేడుకలు

తెలంగాణలో పలు ప్రాంతాల్లో సర్దార్ సర్వాయి పాపన్న గౌడ్ 376వ జయంతి వేడుకలు నిర్వహించారు. మేడ్చల్ బోయినపల్లిలో మాజీ మంత్రి మల్లారెడ్డి ఆయన విగ్రహానికి పూలమాల వేసి నివాళి అర్పించారు. సర్వాయి పాపన్న గౌడ్ జీవిత గాథ తెలంగాణ పోరాట అస్తిత్వానికి పునాది అని మల్లారెడ్డి అన్నారు.

సూర్యాపేట జిల్లా హుజూర్ నగర్ ఇందిరా చౌక్ వద్ద గౌడ యువజన సంఘం ఆధ్వర్యంలో జయంతి వేడుకలను నిర్వహించారు. కళ్ళగీత పారిశ్రామిక సహకార సంఘాలు ఈ కార్యక్రమంలో భాగస్వామ్యం వహించాయి. పలువురు నాయకులు ఆయన చిత్రపటానికి పూలమాలలు వేసి నివాళులు అర్పించారు.

వరంగల్ జిల్లా వర్ధన్నపేట మండలం కొత్తపల్లిలో గ్రామస్థులు నివాళులు అర్పించారు. ప్రజల సంక్షేమం కోసం సర్వాయి పాపన్న గౌడ్ సాగించిన కృషిని యువత ఆదర్శంగా తీసుకోవాలని పలువురు అన్నారు. నిర్మల్‌లో స్థానికులు ఆయన విగ్రహానికి పూలమాల వేసి సేవలను గుర్తు చేసుకున్నారు.