గుంటూరులో లలిత హాస్పిటల్ సూపర్ స్పెషాలిటీ బ్రెయిన్ సెంటర్ ప్రారంభించిన సీఎం చంద్రబాబు

గుంటూరులోని లలిత హాస్పిటల్‌లో కొత్తగా నిర్మించిన సూపర్ స్పెషాలిటీ, బ్రెయిన్ సెంటర్‌ను సీఎం నారా చంద్రబాబు నాయుడు ప్రారంభించారు. ఈ కార్యక్రమంలో హాస్పిటల్ డైరెక్టర్ రాఘవ శర్మ, డైరెక్టర్ విజయ్ తదితరులు పాల్గొన్నారు.

ఏడు ఎకరాల్లో విస్తరించిన ఈ హాస్పిటల్‌లో 600 పడకల సామర్థ్యంతో 900 మంది సిబ్బంది ఉన్నారు. 32 విభాగాల్లో వైద్య సేవలు అందించే ఈ సెంటర్ దక్షిణ భారతదేశంలోనే తొలిసారిగా అత్యాధునిక ఎంఆర్‌ఐ మిషన్‌ను ఏర్పాటు చేసినట్లు సీఎం తెలిపారు. కార్డియాలజీ, న్యూరాలజీ, న్యూరో స్పెషాలిటీ, స్పైన్ సర్జరీ, జాయింట్ రీప్లేస్‌మెంట్ వంటి చికిత్సలు ఇక్కడ అందుబాటులో ఉంటాయి.

ఈ హాస్పిటల్ ఇప్పటికే 15 లక్షల మంది రోగులకు చికిత్స అందించిందని హాస్పిటల్ నిర్వాహకులు చెప్పారు. రోగులు తమ పిల్లలను కూడా ఇక్కడికే తీసుకొస్తున్నారని, అది సంస్థపై ఉన్న నమ్మకాన్ని చూపిస్తుందని చంద్రబాబు అన్నారు.

హైదరాబాద్ 25 ఏళ్ల క్రితం ఎలా మెడికల్ టూరిజం హబ్‌గా ఎదిగిందో, రాబోయే 20 ఏళ్లలో అమరావతి-గుంటూరు ప్రాంతం ప్రపంచ స్థాయి వైద్య కేంద్రంగా అభివృద్ధి చెందుతుందని ఆయన ఆశాభావం వ్యక్తం చేశారు. ఆరోగ్యమే అసలైన సంపద అని, సంపూర్ణ ఆరోగ్యంగా ఉన్నవాడే నిజమైన ధనవంతుడని సీఎం పేర్కొన్నారు.