గుంటూరులో లలిత ఆసుపత్రిని ప్రారంభించిన సీఎం చంద్రబాబు; ఇంటి దగ్గరకే ఆరోగ్య సేవలు అందించే సంజీవని ప్రాజెక్టు వివరాలు వెల్లడి

ముఖ్యమంత్రి చంద్రబాబు నాయుడు గుంటూరు జిల్లా తక్కెళ్లపాడలో లలిత ఆసుపత్రిని ప్రారంభించారు. అత్యాధునిక వైద్య పరికరాలతో ఆసుపత్రిని ఏర్పాటు చేసిన యాజమాన్యాన్ని ఆయన అభినందించారు. దక్షిణ భారతదేశంలోనే తొలిసారి ఇక్కడికి వచ్చిన MRI మిషన్‌ను ప్రత్యేకంగా ప్రస్తావించారు.

ఈ సందర్భంగా ఆయన మాట్లాడుతూ.. సంజీవని ప్రాజెక్టు ద్వారా ప్రజల ఇంటి వద్దకే 42 రకాల వైద్య పరీక్షలు అందిస్తామని తెలిపారు. వల్నరబుల్ పేషెంట్లను గుర్తించి, వారికి ఏం తినాలి, మందులు ఎలా వేసుకోవాలి వంటి సూచనలు ఈ ప్రాజెక్టు ద్వారా అందిస్తామని వివరించారు. పూర్తి డిజిటల్ హెల్త్ రికార్డు ద్వారా డాక్టర్ల అపాయింట్మెంట్లను కూడా సులభతరం చేస్తామన్నారు.

అదే విధంగా, ఆంధ్రప్రదేశ్ ప్రభుత్వం తీసుకొచ్చిన యూనివర్సల్ హెల్త్ కార్యక్రమం ద్వారా ప్రతి కుటుంబానికి రూ. 2.5 లక్షల వరకు ఆరోగ్య బీమా సదుపాయం కల్పిస్తున్నామని సీఎం చెప్పారు. ఎన్టీఆర్ వైద్య సేవ, సీఎం రిలీఫ్ ఫండ్ వంటి పథకాలు పేదల ఆరోగ్యాన్ని కాపాడటానికి ఉద్దేశించినవన్నారు.

వ్యక్తిగత ఆరోగ్యం విషయంలో ప్రతి ఒక్కరూ జాగ్రత్తగా ఉండాలని ఆయన సూచించారు. ఆసుపత్రికి వెళ్ళాల్సిన అవసరం రాకుండా చూసుకోవడమే నిజమైన సంపద అని అన్నారు. యోగ, ధ్యానం, ప్రాణాయామాలకు తమ ప్రభుత్వం అధిక ప్రాధాన్యత ఇస్తోందని వివరించారు. రాబోయే 20 సంవత్సరాల్లో అమరావతి, గుంటూరు ప్రాంతాల్లో అధునాతన వైద్య సేవల కోసం ప్రపంచం నుంచి రోగులు వస్తారని ఆయన ఊహించారు.