మహానాడు వేదికగా చంద్రబాబు కీలక ప్రకటనలు — నదుల అనుసంధానం, మహిళా రిజర్వేషన్లు

మంగళగిరిలోని NTR భవన్‌లో జరిగిన మహానాడు ముగింపు కార్యక్రమంలో TDP అధినేత, CM చంద్రబాబు నాయుడు పలు ప్రకటనలు చేశారు.

నదుల అనుసంధానంపై చంద్రబాబు మాట్లాడుతూ, 36 ప్రాజెక్టులకు తేదీలు నిర్ణయించామని, వాటి ప్రారంభోత్సవాలకు సుమారు ₹40,000 కోట్లు ఖర్చు చేస్తామని చెప్పారు. శ్రీకాకుళం నుంచి చిత్తూరు వరకు ఈ ప్రాజెక్టులు పూర్తి చేస్తామని తెలిపారు. పోలవరం నుంచి వంశధార వరకు, గోదావరి నుంచి పెన్నా నది వరకు నీటిని తీసుకెళ్తామని పేర్కొన్నారు. పెన్నా–బనకచర్ల ద్వారా గోదావరి–కావేరి అనుసంధానం చేయాలని కేంద్రం ఆలోచిస్తోందని చంద్రబాబు వెల్లడించారు.

మహిళా రిజర్వేషన్లపై మాట్లాడుతూ, దేశవ్యాప్తంగా మహిళలకు 33 శాతం రిజర్వేషన్ కోసం పోరాడతామని, అది సాధ్యం కాకపోతే ఆంధ్రప్రదేశ్‌లో TDP మహిళలకు 33 శాతం చట్టసభ సీట్లు ఇస్తుందని చంద్రబాబు ప్రకటించారు. TDP వర్కింగ్ ప్రెసిడెంట్ ఈ సూచన ఇచ్చారని, దానికి తాను అంగీకారం తెలిపానని చెప్పారు.

Mega DSC విషయంలో YSRCP తప్పుడు ప్రచారం చేస్తోందని చంద్రబాబు ఆరోపించారు. 16,000 మంది యువతకు ఉద్యోగాలు వస్తే సంతోషించాల్సింది పోయి, అపోహలు సృష్టిస్తున్నారని అన్నారు. తప్పు చేసిన వారిని వదలమని, తప్పుడు ప్రచారం చేసే వారిని కూడా అడ్డుకుంటామని హెచ్చరించారు.

2029 ఎన్నికలకు ఇప్పటి నుంచే సిద్ధం కావాలని TDP కార్యకర్తలకు చంద్రబాబు దిశానిర్దేశం చేశారు. NDA ప్రభుత్వం చేసిన పనులను ప్రజలకు వివరించాలని కోరారు.