సింగపూర్‌లో భారత హై కమిషనర్‌తో సీఎం చంద్రబాబు భేటీ; ఏపీలో పెట్టుబడులకు సహకారం

సింగపూర్‌లో పర్యటిస్తున్న ఆంధ్రప్రదేశ్ ముఖ్యమంత్రి చంద్రబాబు నాయుడు భారత హై కమిషనర్ డాక్టర్ శిల్ప కంబులేతో భేటీ అయ్యారు. ఈ సందర్భంగా ఆంధ్రప్రదేశ్ అభివృద్ధిలో సింగపూర్ కీలక భాగస్వామి కావాలని కోరారు. రాష్ట్రంలోని ఫుడ్ ప్రాసెసింగ్, ఎలక్ట్రానిక్స్, సెమీకండక్టర్లు, క్వాంటం టెక్నాలజీ, షిప్ బిల్డింగ్, సివిల్ ఏవియేషన్ ఎంఆర్ఓ, రోబోటిక్స్, మెడికల్ డివైసెస్, హార్డ్‌వేర్ తయారీ రంగాల్లో పెట్టుబడి అవకాశాలను వివరించారు.

ప్రకృతి సేద్యంలో కొత్త లక్ష్యాలను సాధిస్తున్నామని, ఆహార రంగంలో ట్రేసబిలిటీ సాధించే దిశగా ప్రయత్నిస్తున్నామని చంద్రబాబు తెలిపారు. సింగపూర్ టెక్ రంగ అవసరాలను తీర్చేందుకు రాష్ట్ర యువత సిద్ధంగా ఉందన్నారు. అభివృద్ధి, పెట్టుబడులలో రాజకీయ వ్యవస్థ, బ్యూరోక్రసీ జాప్యం లేకుండా ప్రధాని మోదీ చొరవ తీసుకుంటున్నారని, ఆయన ప్రోత్సాహంతో ప్రపంచస్థాయి సంస్థలు ఏపీకి వచ్చాయని వివరించారు. సింగపూర్ విశ్వవిద్యాలయాలు, ఆంధ్రప్రదేశ్ విద్యా సంస్థల మధ్య భాగస్వామ్యానికి విజ్ఞప్తి చేశారు.

హై కమిషనర్ అంబులే మాట్లాడుతూ, గ్రీన్ ఎనర్జీ, సెమీకండక్టర్ ఎకోసిస్టమ్‌లో సింగపూర్ ముందంజలో ఉందని, భారత్‌లోని వివిధ రాష్ట్రాలతో కలిసి పనిచేసేందుకు ఆసక్తిగా ఉన్నామని చెప్పారు. ఏపీలో పెట్టుబడులకు అవసరమైన సహకారం అందిస్తామని హామీ ఇచ్చారు.