ద్రౌపది ముర్ము జీవితం స్ఫూర్తి: అంతర్జాతీయ ఆదివాస దినోత్సవంలో సీఎం చంద్రబాబు

ముఖ్యమంత్రి చంద్రబాబు నాయుడు అంతర్జాతీయ ఆదివాస దినోత్సవం సందర్భంగా మాట్లాడుతూ రాష్ట్రపతి ద్రౌపది ముర్ము ప్రయాణం స్ఫూర్తిదాయకమని పేర్కొన్నారు. ఒడిశాలోని ఒక గిరిజన కుటుంబంలో జన్మించిన ముర్ము ఉపాధ్యాయురాలిగా, మంత్రిగా, జార్ఖండ్ గవర్నర్‌గా పనిచేసి 2022లో దేశానికి తొలి ఆదివాస మహిళా రాష్ట్రపతిగా ఎన్నికయ్యారు.

ఆమె వ్యక్తిగత కష్టాలు అధిగమించి ఈ స్థాయికి చేరుకోవడం మహిళలకు, ఆదివాసులకు గొప్ప సందేశం అని సీఎం చెప్పారు. డాక్టర్ అబ్దుల్ కలాం, బీఆర్ అంబేడ్కర్, ఎన్టీఆర్, ప్రధాని నరేంద్ర మోడీ వంటి నేతలు కూడా సామాన్య కుటుంబాల నుంచి వచ్చి ఉన్నత శిఖరాలకు చేరారని ఆయన గుర్తు చేశారు.

ఆగస్టు 9 నుంచి 15 వరకు ఆదివాస దినోత్సవ వేడుకలు ప్రభుత్వం నిర్వహిస్తుందని, ఈ సందర్భంగా ‘సంకల్పమే శక్తి’ అనే నినాదం ఇచ్చినట్లు చంద్రబాబు ప్రకటించారు. 2047 నాటికి ‘వికసిత్ భారత్, స్వర్ణాంధ్రప్రదేశ్’ లక్ష్యంగా కృషి చేయాలని ప్రజలకు పిలుపునిచ్చారు.

ప్రతి ఒక్కరూ తమ వ్యక్తిగత అభివృద్ధితో పాటు సమాజం, దేశం కోసం పనిచేయాలని, దేశభక్తి అన్నింటికంటే ముఖ్యమని సీఎం ఉద్ఘాటించారు.