వర్షపాతం 39% తగ్గే అవకాశం: జలధార-జలహారతిని నిరంతరం కొనసాగించాలని సీఎం ఆదేశం

ఎల్నినో ప్రభావంతో ఈ ఏడాది వర్షపాతం సాధారణం కంటే 39% తగ్గే అవకాశం ఉన్న నేపథ్యంలో CM చంద్రబాబు నాయుడు ఉన్నతాధికారులతో వీడియో కాన్ఫరెన్స్ నిర్వహించారు. ఈ సందర్భంగా జలధార-జలహారతి కార్యక్రమాన్ని నిరంతరం కొనసాగించాలని ఆదేశించారు.

జలధార-జలహారతి కింద రాష్ట్రంలో గుర్తించిన 82,865 పనుల్లో ఇప్పటికే 79,826 పూర్తయ్యాయని అధికారులు వివరించారు. రూ.3,409.35 కోట్లతో చెరువులు, ఫీడర్ ఛానెల్స్, ఫార్మ్ పాండ్లు, ట్రెయిన్ల తవ్వకం పనులు జరుగుతున్నాయి.

ఈ ఏడాది జూన్ నుంచి డిసెంబర్ మధ్య 867 mm వర్షపాతం నమోదవ్వాల్సి ఉండగా, ప్రస్తుతం కేవలం 525 mm మాత్రమే నమోదయ్యే అవకాశం ఉన్నట్లు అధికారులు CM దృష్టికి తెచ్చారు. ఈ నెలలో దాదాపు 56% వర్షపాత లోటు ఏర్పడవచ్చని తెలిపారు.

గత ఏడాది ఇదే సమయానికి రాష్ట్రంలోని రిజర్వాయర్లలో 825.67 tmc ft నీరు ఉండగా, ప్రస్తుతం అది 563.05 tmc ft కు తగ్గింది. భూగర్భ జలమట్టాలు మరింత క్షీణించే ప్రమాదం ఉందని, తాగునీటి సరఫరాకు ప్రత్యేక ప్రణాళిక రూపొందించాలని CM సూచించారు. వెలుగోడు, గోరకల్లు, జీడిపల్లి, చెర్లోపల్లి, అవ్వుకు రిజర్వాయర్లలో తాగునీటి కోసం నీటిని నిల్వ చేయాలన్నారు. నగర్జునసాగర్ కాలువల ద్వారా జిల్లాలకు నీటి కేటాయింపులు వెంటనే ప్రకటించాలన్నారు.

నీటి కొరత ప్రాంతాలను ముందే గుర్తించి ట్యాంకర్ల ద్వారా సరఫరా చేయడం, ఎగువ ప్రాంతాల నుంచి వరద నీటిని ఒడిసిపట్టి రిజర్వాయర్లు నింపడం వంటి చర్యలు తీసుకోవాలని CM ఆదేశించారు. ఇప్పటికే సాగులో ఉన్న పంటలకు ప్రాధాన్యతతో నీరు విడుదల చేయాలని, తక్కువ నీటి వాడకంతో సాగు చేసే పంటలను ప్రోత్సహించాలని సూచించారు. పరిశ్రమలకు నీటి సరఫరా నిలిచిపోకుండా చూడాలన్నారు.

పశుగ్రాసం కొరత రాకుండా మేత నిల్వలను సిద్ధం చేయాలని, అవసరమైన చోట్ల గోకులాలు ఏర్పాటు చేయాలని CM స్పష్టం చేశారు. జిల్లా కలెక్టర్లు నిరంతరం పర్యవేక్షించాలని, నీటి పొదుపుపై ప్రజల్లో అవగాహన కల్పించాలని ఆదేశించారు. అదనపు నీరు ఉన్న ప్రాంతాల నుండి లోటు ఉన్న ప్రాంతాలకు మైక్రో బేసిన్ అనుసంధానం చేసే అవకాశాలను పరిశీలించాలన్నారు.