విశాఖలో ఏయూ క్యాంపస్‌లో సీఎం చంద్రబాబు మొక్కలు నాటారు, సైకిల్ యాత్ర ప్రారంభం

విశాఖపట్నం: ఆంధ్రప్రదేశ్ ముఖ్యమంత్రి చంద్రబాబు నాయుడు బుధవారం ఉదయం ఏయు ఇంజనీరింగ్ కాలేజ్ మైదానంలో ప్రపంచ పర్యావరణ దినోత్సవంలో భాగంగా మొక్కలు నాటారు. అనంతరం బీచ్ రోడ్డుపై సైకిల్ యాత్రను ప్రారంభించారు.

విశ్వవిద్యాలయ అధికారులతో మాట్లాడిన సీఎం, 450 ఎకరాల క్యాంపస్‌లో నెట్‌జీరో కాన్సెప్ట్ అమలు చేయాలని సూచించారు. 100 శాతం సౌర విద్యుత్ ఉత్పత్తి చేసుకోవడం, అదనపు విద్యుత్ ను బయటకు ఇవ్వడం లాంటి ప్రణాళిక రూపొందించాలన్నారు. 'తిరుమలలో 89.5 శాతం గ్రీన్ కవర్ ఉంది. ఇక్కడ కూడా అలాంటి పరిస్థితి తీసుకురావాలి' అని ఆయన వివరించారు. 100 ఏళ్ల చరిత్ర కలిగిన ఈ యూనివర్సిటీని ఒక మోడల్ క్యాంపస్‌గా మార్చేందుకు చర్యలు తీసుకోవాలని సీఎం నిర్దేశించారు.