శ్రీశైలం ఘాట్ రోడ్డుకు ఎలివేటెడ్ కారిడార్: సీఎం చంద్రబాబు ప్రధానికి వినతి

శ్రీశైలం క్షేత్రానికి భక్తుల సంఖ్య పెరుగుతుండటంతో ఘాట్ రోడ్డు సమస్యల పరిష్కారంపై ముఖ్యమంత్రి చంద్రబాబు నాయుడు దృష్టి పెట్టారు. ఘాట్ రోడ్డు మీద ఎలివేటెడ్ కారిడార్ నిర్మించాలని ప్రధాని మోదీకి ఆయన వినతి పంపారు.

ఈ విషయాన్ని మంత్రి ఆనం రామనారాయణ రెడ్డి తెలియజేశారు. ఆయన శ్రీశైలం దేవస్థానం ఉద్యోగుల కోసం సున్నిపెంటలో రూ.60 కోట్లతో నిర్మించిన క్వార్టర్స్‌ను పరిశీలించారు. హైదరాబాద్ నుంచి శ్రీశైలం వరకు, దోర్నాల నుంచి శ్రీశైలం వరకు ఉన్న ఘాట్ రోడ్డు ఇరుగ్గా ఉండటంతో భక్తుల వాహనాలకు తీవ్ర అంతరాయం ఏర్పడుతోందని, రోడ్లు వెడల్పు చేయాల్సిన అవసరం ఉందని, ట్రాఫిక్ పెరిగిపోయిందని ఆయన వివరించారు.

శ్రీశైలం టౌన్‌షిప్ అభివృద్ధికి 4000 హెక్టార్ల భూమి అవసరమని, కనీసం 2000 హెక్టార్లు ఇవ్వాలని ప్రభుత్వాన్ని కోరినట్టు మంత్రి చెప్పారు. దోర్నాల, ఆత్మకూరు, తెలంగాణ వైపు నుంచి ఎలివేటెడ్ కారిడార్ ఏర్పాటు చేయడంపై జాతీయ రహదారుల సంస్థ ఒక ప్రణాళిక రూపొందించాలని కేంద్రం ఆదేశించినట్టు సమాచారం ఉందని ఆయన తెలిపారు.

గతంలో ముఖ్యమంత్రి చంద్రబాబు నాయుడు ఉద్యోగులకు మెరుగైన రెసిడెన్షియల్ ప్రాంతాలు నిర్మించాలని ఆదేశించారు. దీంతో త్వరలో ఉద్యోగులు కుటుంబాలతో ఇక్కడికి తరలిరానున్నారు.