కేంద్ర సోలార్ స్కీమ్ క్రెడిట్ను తెలంగాణ ప్రభుత్వం కాజేస్తోంది: ఎంపీ రఘునందన్ రావు

బీజేపీ ఎంపీ రఘునందన్ రావు నేడు తెలంగాణ ప్రభుత్వంపై తీవ్ర ఆరోపణలు చేశారు. కేంద్రం అమలు చేస్తున్న PM సూర్య ఘర్: ముఫ్త్ బిజిలీ యోజన పథకం క్రెడిట్ను రాష్ట్ర ప్రభుత్వం సొంతం చేసుకుంటోందని ఆయన విమర్శించారు.

ఆయన మాట్లాడుతూ, ముఖ్యమంత్రి రేవంత్ రెడ్డి తన స్వగ్రామం కొండారెడ్డిపల్లిలో ప్రతి ఇంటికీ ఉచితంగా సోలార్ ప్లేట్లు ఏర్పాటు చేస్తున్నట్లు ప్రచారం చేస్తున్నారని, కానీ కేంద్రం 2 కిలోవాట్లకు రూ.60,000, 3 కిలోవాట్లకు రూ.78,000 సబ్సిడీ ఇస్తోందని, మిగిలిన మొత్తం కార్పొరేట్ సామాజిక బాధ్యత (CSR) నిధుల ద్వారా సమకూరుతోందని వివరించారు.

కేంద్రం ఇచ్చే సబ్సిడీ విషయాన్ని రాష్ట్ర ప్రభుత్వం దాచిపెడుతోందని ఆరోపించారు. ఈ పథకం రాష్ట్రవ్యాప్తంగా విస్తరిస్తే, 40 వేల ఇండ్లకు సంబంధించి రూ.200 కోట్ల అవకతవకలు జరిగే అవకాశం ఉందని హెచ్చరించారు. కేంద్రం పాత్రను బహిర్గతం చేయాలని డిమాండ్ చేశారు. ఈ విషయంపై ముఖ్యమంత్రి కార్యాలయం స్పందన తెలియాల్సి ఉంది.