యూరప్ వేడిగాలులపై సీఎం చంద్రబాబు స్పందన; నీటి సంరక్షణపై సూచనలు

యూరప్ లో ఎండల తీవ్రత, నీటి సంరక్షణ అవసరం గురించి ఏపీ ముఖ్యమంత్రి చంద్రబాబు నాయుడు మాట్లాడారు.

యూరప్ లో ఉష్ణోగ్రతలు 45-50 డిగ్రీలకు చేరాయని, వేడికి కార్ల టైర్లు పగిలిపోయి రైళ్లు ఆగిపోయాయని, అక్కడి ప్రభుత్వాలు రోడ్లపై నీళ్లు చల్లాల్సిన పరిస్థితి వచ్చిందని చెప్పారు. ఇది ప్రకృతి వైపరీత్యాల ప్రభావమని, ప్రపంచం ఎదుర్కొంటున్న సమస్య అని వివరించారు.

ఇదే సందర్భంలో ఆయన ఏపీ నీటి పరిస్థితి గురించి మాట్లాడారు. గత సంవత్సరం వర్షాలు బాగా పడి గోదావరి, కృష్ణా నదులు పొంగాయని, జలాశయాల్లో 65% నీరు నిల్వ చేసినట్లు తెలిపారు. కానీ ఈ ఏడాది జూలై వరకు గోదావరి, కృష్ణా నదులకు నీళ్లు రాలేదని, ఆల్మట్టికి కూడా నీరు రాలేదని, కారణం ఎగువన వర్షాలు పడకపోవడమే అని ఆయన విశ్లేషించారు.

ఈ పరిస్థితుల్లో రైతులు అప్రమత్తంగా ఉండాలని, నీటి సంరక్షణ కోసం 'జలధార' కార్యక్రమం ప్రారంభించినట్లు సీఎం తెలిపారు. వర్షపు నీటిని భూగర్భంలోకి ఇంకింపజేయడం, భూమినే జలాశయంగా మార్చడం ఈ కార్యక్రమ లక్ష్యమన్నారు. కృష్ణా-గోదావరి అనుసంధానం ఇప్పటికే జరిగిందని, రాష్ట్రంలోని అన్ని నదుల అనుసంధానం భవిష్యత్తులో చేస్తామని, గోదావరి-కావేరి లింక్ కోసం కేంద్రం, రాష్ట్ర ప్రభుత్వం కృషి చేస్తున్నాయని చెప్పారు.

సోలార్ విద్యుత్ ప్రోత్సాహం, ఇథనాల్‌తో వాహనాలు నడిపే అవకాశం వంటి అంశాలను కూడా ఆయన ప్రస్తావించారు. ఈరోజు హీరో మోటార్స్ గ్లోబల్ పార్ట్స్ సెంటర్‌ను ప్రారంభించినట్లు తెలిపారు.