ఏపీ శాసనమండలిలో జాతీయ జెండా ఎగరవేసిన చైర్మన్ కొయ్యే మోషేన్ రాజు

ఏపీ శాసనమండలి చైర్మన్ కొయ్యే మోషేన్ రాజు 80వ స్వాతంత్ర్య దినోత్సవం సందర్భంగా శాసనమండలి ప్రాంగణంలో జాతీయ జెండాను ఎగురవేశారు. ఆయన రాష్ట్ర ప్రజలకు స్వాతంత్ర్య దినోత్సవ శుభాకాంక్షలు తెలిపారు.

ఈ సందర్భంగా చైర్మన్ మాట్లాడుతూ, సుమారు 200 సంవత్సరాల బ్రిటిష్ పాలన నుంచి దేశానికి స్వాతంత్ర్యం లభించిందన్నారు. మహాత్మా గాంధీ, సుభాష్ చంద్రబోస్, అల్లూరి సీతారామరాజు వంటి ఎందరో నాయకులు చేసిన త్యాగాలను ఆయన గుర్తుచేశారు.

దేశ భవిష్యత్తు యువతపైనే ఆధారపడి ఉందని చైర్మన్ అన్నారు. యువతకు ఉపాధి కల్పించాల్సిన అవసరం ఉందని ఆయన ప్రస్తావించారు. దేశ అభివృద్ధి కోసం మతాలు, కులాల గురించిన విభేదాలను పక్కనపెట్టాలని సూచించారు.

ప్రతి పౌరుడికి సమాన అవకాశాలు, స్వేచ్ఛ లభించాలన్నారు. స్వాతంత్ర్యం అంటే కేవలం ఒక వర్గం పాలకుల నుంచి మరో వర్గం పాలకులకు అధికారం మారడం కాదని ఆయన అభిప్రాయపడ్డారు.