అమరావతి నిర్మాణ పనులపై సీఎం చంద్రబాబు సమీక్ష: వేగం పెంచాలని ఆదేశం

మంగళవారం సచివాలయంలో సీఎం చంద్రబాబు నాయుడు అమరావతి నిర్మాణ సంస్థల ప్రతినిధులతో సమీక్ష సమావేశం నిర్వహించారు. రాజధాని నిర్మాణ పనుల్లో వేగం మరింత పెంచాలని అధికారులను ఆదేశించారు.

ప్రస్తుతం అమరావతిలో 95 ప్రాజెక్టులకు సంబంధించి రూ.50,999 కోట్ల విలువైన పనులు జరుగుతున్నాయి. వీటిలో నెలకు కనీసం 7.92% పురోగతి సాధించాలని సీఎం లక్ష్యాన్ని నిర్దేశించారు. ఆర్థిక ఇబ్బందులు లేవని, గడువు లోపు ప్రతి ప్రాజెక్ట్ పూర్తి చేయాలని స్పష్టం చేశారు.

భూసేకరణ, నిధుల సమీకరణ, అనుమతులు, డిజైన్ల విషయంలో అన్ని శాఖల ఉన్నతాధికారులు సమన్వయంతో పనిచేయాలని ఆయన సూచించారు. విజయవాడ, గుంటూరులతో అమరావతిని అనుసంధానం చేసే మౌలిక వసతుల ప్రాజెక్టుల పనులు వేగవంతం చేయాలన్నారు. రోడ్లు, పచ్చదనం పెంపుపై దృష్టి పెట్టాలని ఆదేశించారు.

ఇకపై తాను స్వయంగా రాజధాని పనులను పరిశీలిస్తానని సీఎం చెప్పారు. ఈ సమావేశంలో మంత్రి నారాయణ, సీఎస్ సాయి ప్రసాద్, వివిధ శాఖల ఉన్నతాధికారులు, కాంట్రాక్టు సంస్థల ప్రతినిధులు పాల్గొన్నారు.