ఎల్‌నినో ప్రభావంపై సీఎం చంద్రబాబు సమీక్ష; వారం వారం నివేదిక ఇవ్వాలని ఆదేశం

ఎల్‌నినో పరిస్థితులను ఎదుర్కొనేందుకు తీసుకోవాల్సిన చర్యలపై ముఖ్యమంత్రి చంద్రబాబు నాయుడు సచివాలయంలో అధికారులతో సమీక్ష నిర్వహించారు. రైతులకు అండగా ఉండాలని, నిర్లక్ష్యాన్ని సహించబోమని ఆయన స్పష్టం చేశారు.

ఈ సందర్భంగా ప్రతి పంటకు బీమా తప్పనిసరి అని, ఎక్కడైనా నమోదు కాకపోతే సంబంధిత కలెక్టర్లే బాధ్యత వహించాలని సీఎం సూచించారు. తాగునీటి సమస్య తలెత్తకుండా చూడాలని, ఏడాదికి సరిపడా పశుగ్రాసం అందుబాటులో ఉంచాలని ఆదేశించారు. కూరగాయల ధరలు పెరగకుండా చర్యలు తీసుకోవాలని, జిల్లాకు ఒక మొబైల్ రైతు బజారు ఏర్పాటు చేయాలని సూచించారు.

వ్యవసాయ అనుబంధ శాఖల అధికారులు సమావేశంలో వివరాలు వెల్లడించారు. జూలైలో 69% లోటు వర్షపాతం నమోదైందని, వచ్చే మూడు నెలల్లో సగటున 35-40% వర్షాభావం ఉండొచ్చని అంచనా వేశారు. జూన్-నవంబర్‌లో 844 మిల్లీమీటర్ల వర్షం కురవాల్సి ఉండగా, 551 మిల్లీమీటర్లకే పరిమితం కావచ్చని చెప్పారు. ప్రకాశం, పశ్చిమ గోదావరి, అన్నమయ్య, కృష్ణ, కడప జిల్లాల్లో అధిక వర్షాభావం ఏర్పడుతుందని, 2.78 లక్షల హెక్టార్ల పత్తి, 7,000 హెక్టార్ల వరిపై ప్రభావం ఉంటుందని వివరించారు.

పశుగ్రాసం కోసం 286.3 లక్షల టన్నుల నిల్వలు ఐదు నెలలకు సరిపోగలవని అధికారులు తెలిపారు. ఆగస్టు నుంచి అవగాహన కార్యక్రమాలు నిర్వహిస్తామని, అత్యవసర విత్తన ప్రణాళిక సిద్ధం చేసినట్టు చెప్పారు.

పంటల బీమా నమోదుకు జూలై 31 వరకు, కొన్ని పంటలకు ఆగస్టు 15 వరకు గడువు ఉందని, రాష్ట్రంలో ఇప్పటికే 6.3 లక్షల హెక్టార్లకు బీమా నమోదు చేసినట్లు సీఎం‌కు వివరించారు. ఎల్‌నినో ప్రభావంపై ప్రతివారం నివేదిక ఇవ్వాలని, రైతు సేవా కేంద్రాలను కన్వీనర్లుగా చేసి కమిటీలు ఏర్పాటు చేయాలని సీఎం ఆదేశించారు.