తుఫాన్ పర్యవేక్షణలో 40 పారామీటర్ల రియల్ టైమ్ డేటా: సీఎం చంద్రబాబు

తుఫాన్ కదలిక, వర్షపాతం, గాలుల తీవ్రతను నిరంతరం పర్యవేక్షిస్తున్నామని ముఖ్యమంత్రి చంద్రబాబు నాయుడు తెలిపారు. క్షేత్రస్థాయి పరిస్థితులను ఎప్పటికప్పుడు అధ్యయనం చేస్తున్నామని ఆయన చెప్పారు.

వివిధ వర్గాలు వేర్వేరు అంచనాలు ఇస్తుంటాయని, వాటిలో వాస్తవానికి దగ్గరగా ఉండే మోడల్‌ను ఎంచుకున్నామని చంద్రబాబు వివరించారు. ఆ మోడల్‌ను కొంత నిర్మాణాత్మకంగా మార్చుకుని ఉపయోగిస్తున్నామని తెలిపారు.

IMD సహా వివిధ వనరుల నుంచి దాదాపు 40 పారామీటర్ల రియల్ టైమ్ డేటా అందుతోందని ఆయన తెలిపారు. గాలి, వర్షపాతం, రైన్ గేజ్‌లు, రిజర్వాయర్ సెన్సార్లు, క్యాచ్‌మెంట్ ఏరియా లెక్కలతో పాటు ఉపగ్రహం, రాడార్ డేటాను పరిగణనలోకి తీసుకుంటున్నట్లు చెప్పారు.

ఎప్పటికప్పుడు అంచనాలు వేసి, ఆ ఆధారంగా కలెక్టర్లకు, అధికారులకు మార్గదర్శకం ఇస్తున్నట్లు ముఖ్యమంత్రి పేర్కొన్నారు.