ప్రతి గిరిజన గ్రామంలో మొబైల్ కనెక్టివిటీ, 64,066 ఇళ్ల నిర్మాణం: సీఎం చంద్రబాబు

AP ముఖ్యమంత్రి చంద్రబాబు నాయుడు గిరిజన ప్రాంతాల అభివృద్ధిపై కీలక ప్రకటనలు చేశారు. ప్రతి గిరిజన గ్రామంలో మొబైల్ సిగ్నళ్లు అందించేందుకు టెలికాం కంపెనీలతో ఒప్పందం కుదిర్చినట్టు వెల్లడించారు. ఎయిర్టెల్, జియో వంటి సంస్థల సహకారంతో మారుమూల తాండాలు, గ్రామాలకు కనెక్టివిటీ ఇవ్వనున్నట్టు తెలిపారు.

అంతేకాకుండా, 64,066 ఇళ్ల నిర్మాణం, 83,923 మందికి ఇంటిపై సోలార్ ప్యానెళ్లు ఏర్పాటు చేయనున్నట్టు ప్రకటించారు. 'అడవి తల్లి బాట' పథకం కింద రూ.1000 కోట్లతో 905 కి.మీ. రోడ్ల నిర్మాణం చేపడతామని స్పష్టం చేశారు. 108, 104 వైద్య సేవలు, ఫీడర్ అంబులెన్సులు వంటి సౌకర్యాలు కూడా విస్తరిస్తామన్నారు.

అదే విధంగా, తాము ప్రారంభించిన అరకు కాఫీ ప్రపంచవ్యాప్తంగా గుర్తింపు సాధించిందని సీఎం వివరించారు. 25 ఏళ్ల క్రితమే చిరు ప్రయత్నంగా మొదలైన ఈ కాఫీ సాగు ఇప్పుడు అంతర్జాతీయ బ్రాండ్‌గా ఎదిగిందని, పారిస్‌లోనూ అరకు కాఫీ అమ్మకాలు జరుగుతున్నాయని చెప్పారు. ప్రధానమంత్రి నరేంద్ర మోడీ సైతం ఈ కాఫీని ప్రశంసించారని, ఆస్ట్రేలియా ప్రధానికి గిఫ్ట్‌గా అందించారని గుర్తు చేశారు.

ట్రైబల్ కార్పొరేషన్ ద్వారా కాఫీ ట్రేసబిలిటీ వ్యవస్థను తీసుకొస్తున్నామని, దీని వల్ల కొనుగోలుదారుడు ఏ గ్రామంలో, ఏ రైతు పండించిందీ తెలుసుకోవచ్చన్నారు. గిరిజన రైతుల ఆదాయాన్ని పెంచడమే లక్ష్యంగా పనిచేస్తున్నట్టు స్పష్టం చేశారు.