సీఎం చంద్రబాబు: గిరిజనులకు ఇళ్ళు, సోలార్, అరకు కాఫీ బ్రాండింగ్

ఏపీ ముఖ్యమంత్రి చంద్రబాబు నాయుడు గిరిజన అభివృద్ధికి పలు పథకాలను ప్రకటించారు. గిరిజన ఆదివాసీలకు 64,066 ఇళ్ళు నిర్మిస్తామని, 83,923 మందికి ఇంటి పైన సోలార్ ప్యానల్స్ ఏర్పాటు చేస్తామని తెలిపారు.

అడవి తల్లి బాట పేరుతో రూ.1000 కోట్లతో 905 కిలోమీటర్ల రోడ్లు వేస్తున్నామని ఆయన చెప్పారు. టెలికమ్యూనికేషన్ సంస్థలతో ఒప్పందం చేసుకుని మారుమూల గిరిజన ప్రాంతాలకు మొబైల్ నెట్‌వర్క్ అందిస్తామని వివరించారు.

25 ఏళ్ల క్రితం అరకు కాఫీ ప్లాంటేషన్ ప్రారంభించానని, ఇప్పుడు అది ప్రపంచవ్యాప్తంగా గుర్తింపు పొందుతోందని సీఎం తెలిపారు. 2016లో ప్రధాని మోదీ విశాఖలో అరకు కాఫీ తాగారని, మన్ కీ బాత్‌లో దాన్ని ప్రస్తావించారని చెప్పారు. ఆస్ట్రేలియా ప్రధానికి అరకు కాఫీ బహుమతిగా ఇవ్వడం వల్ల దీనికి అంతర్జాతీయ గుర్తింపు లభించిందని ఆయన పేర్కొన్నారు.

పెప్పర్, పసుపు, పైనాపిల్, తేనె, తాటి బెల్లం వంటి గిరిజన ఉత్పత్తులకు బ్రాండింగ్ చేసి మార్కెటింగ్ చేస్తామని హామీ ఇచ్చారు. అరకులో సేఫ్రన్ సాగు కూడా సాధ్యమవుతోందని తెలిపారు. అరకు కాఫీని గ్లోబల్ బ్రాండ్‌గా తీర్చిదిద్ది గిరిజనులకు ఆదాయం కల్పించడమే లక్ష్యమని సీఎం వివరించారు.