గిరిజన విద్యార్థులు ఐఐటీలకు వెళ్లాలని సీఎం చంద్రబాబు పిలుపు

విజయవాడలో జరిగిన ప్రపంచ ఆదివాసి దినోత్సవ కార్యక్రమంలో ముఖ్యమంత్రి చంద్రబాబు నాయుడు పాల్గొన్నారు. ఈ సందర్భంగా ఆయన మాట్లాడుతూ గిరిజన విద్యార్థులు చదువుకొని ఐఐటీల్లో చేరాలని, దేశానికి ఉపయోగపడాలని పిలుపునిచ్చారు.

అరకు కాఫీని ప్రోత్సహించి ప్రపంచ స్థాయికి తీసుకువెళ్లాలని సీఎం అన్నారు. పార్లమెంట్‌లో కూడా అరకు కాఫీ స్టాల్ ఏర్పాటు చేయించామని గుర్తు చేశారు. అరకు కాఫీని గ్లోబల్ బ్రాండ్‌గా మారుస్తామని ఆయన హామీ ఇచ్చారు. ప్రధాని మోడీ కూడా అరకు కాఫీని ప్రశంసించారని తెలిపారు.

ఈ కార్యక్రమంలో గిరిజన సంక్షేమ శాఖ పరిధిలోని ఐటీడీఏలు వివిధ ప్రైవేట్ సంస్థలతో ఎంఓయూలు కుదుర్చుకున్నాయి.

తాము సమైక్య ఆంధ్రప్రదేశ్‌లో చూసిన పోడు వ్యవసాయం ఇప్పుడు ఆగిపోయిందని, గిరిజనుల అభివృద్ధికి తిరుగు లేదని సీఎం అన్నారు. ప్రతి వ్యక్తికి ఒక విజన్ ఉండాలని, జాతీయ జెండా స్ఫూర్తితో ముందుకు సాగితే ప్రభుత్వం పూర్తి సహకారం అందిస్తుందని చెప్పారు.